ސިންގަޕޫރަށް ކުރެއްވި ނުރަސްމީ ދަތުރު ނިންމަވާލެއްވުމަށްފަހު ރައީސް ޑރ. މުހައްމަދު މުއިއްޒާއި އެ މަނިކުފާނުގެ އަނބިކަނބަލުން ސާޖިދާ މުހައްމަދު މިރޭ ރާއްޖެ ވަޑައިގެންފިއެވެ.
ރައީސުލްޖުމްހޫރިއްޔާގެ އޮފީހުން މައުލޫމާތު ދެއްވި ގޮތުގައި، މި ދަތުރުފުޅަކީ ނުރަސްމީ ދަތުރުފުޅެކެވެ. ނަމަވެސް، މި ދަތުރުފުޅާ ގުޅޭ އިތުރު އެއްވެސް ތަފްސީލެއް ރައީސް އޮފީހުން ހާމަކޮށްފައެއް ނުވެއެވެ.
ރައީސް ސިންގަޕޫރަށް ވަޑައިގެންފައިވަނީ މި މަހުގެ 27 ވަނަ ދުވަހުއެވެ.
ރައީސް މުއިއްޒު ވަނީ މިދިޔަ މެއި މަހުވެސް ސިންގަޕޫރަށް ދަތުރުފުޅެއް ކުރައްވާފައެވެ. މީގެ އިތުރުން ނިމިދިޔަ އަހަރުގެ ތެރޭގައި ވެސް އެމަނިކުފާނު ސިންގަޕޫރަށް ދެ ދަތުރުފުޅެއް ކުރައްވާފައި ވެއެވެ.
މި ދެ ދަތުރުފުޅުގެ ތެރެއިން، މިދިޔަ އަހަރުގެ ޖޫން މަހުގެ 29 އިން ޖުލައި މަހުގެ 2 ވަނަ ދުވަހުގެ ނިޔަލަށް އެމަނިކުފާނު ސިންގަޕޫރަށް ކުރެއްވި ރަސްމީ ދަތުރުފުޅަކީ އެ ގައުމުގެ ރައީސް ތަރްމަން ޝަންމުގަރަނަމްގެ ދައުވަތަކަށް ކުރެއްވި ދަތުރުފުޅެކެވެ. މި ދަތުރުފުޅުގައި އެމަނިކުފާނުގެ އަނބިކަނބަލުން ސާޖިދާ މުހައްމަދު ވެސް ބައިވެރިވެވަޑައިގެންނެވިއެވެ.
އެ ރަސްމީ ދަތުރުފުޅުގައި ދެ ގައުމުގެ ދެމެދުގައި އިތުރު ދާއިރާތަކުން ގުޅުން ބަދަހިކުރުމަށާއި، ދެ ގައުމަށް މަންފާކުރާނެ ތަރައްގީގެ މަޝްރޫއުތަކާ ގުޅޭގޮތުން ފުޅާ ދާއިރާއެއްގައި ސިންގަޕޫރުގެ ސަރުކާރާއެކު މަޝްވަރާކުރައްވާފައިވެއެވެ.
