ވޭތުވެދިޔަ ހަފްތާގައި މާލެ ސަރަޙައްދުން ހިމަބިހި ފެނުނު މިންވަރު ވަރަށް ބޮޑަށް ދަށަށް ހިނގައްޖެއެވެ.
އެޗްޕީއޭއިން ޢާންމުކޮށްފައިވާ މައުލޫމާތުތަކަށް ބަލާއިރު ވޭތުވެދިޔަ ހަފްތާގައި މާލެ ސަރަޙައްދުން ހިމަބިހީގެ ފެނުނީ އެންމެ ދެ ކޭސްއެވެ. މިއާއެކު މި އަހަރުގެ މިހާތަނަށް ރިޕޯޓުކުރެވުނު ހިމަބިހީގެ ޖުމްލަ ކޭސްތަކުގެ އަދަދަކީ 284 ކަމަށް އެޗްޕީއޭއިން ބުނެފައި ވެއެވެ.
މި ބަލިން ރައްކާތެރިވުމަށް ގައުމީ ފެންވަރުގައި ކުރިއަށްގެންދާ ވެކްސިން ޕްރޮގްރާމުގެ ދަށުން މިހާތަނަށް ޖުމްލަ 16,453 ފަރާތަކަށް ވަނީ ހިމަބިހި ވެކްސިން ދީފައެވެ.
ހިމަބިހިން ރައްކާތެރިވުމަށްޓަކައި، ވެކްސިންގެ ދެ ޑޯޒް ފުރިހަމަކޮށްފައިވާކަން ޔަޤީންނުވާ ފަރާތްތަކުން ލަސްނުކޮށް ކަނޑައެޅިފައިވާ މަރުކަޒުތަކަށް ވަޑައިގެން ވެކްސިން ފުރިހަމަކުރުމަށް އެޗްޕީއޭއިން ވަނީ އިލްތިމާސްކޮށްފައެވެ. އަދި ބަލިޖެހިފައިވާ މީހަކާ ކޮންޓެކްޓްވިކަން އެނގޭ ފަރާތްތަކުގެ ތެރެއިން 2 ޑޯޒް ފުރިހަމަނުވާ ފަރާތްތަކުން ކަނޑައެޅިފައިވާ ވަގުތުގައި ވެކްސިން ފުރިހަމަކުރުމަށް ވެސް ވަނީ އަންގާފައެވެ.
"މީސްލްސް" ނަމަކަށް ކިޔާ ވައިރަހަކުން ޖެހޭ މި ބައްޔަކީ ވައިގެ ޒަރީއާއިން އިންތިހާއަށް ހަލުވިކަމާއެކު ފެތުރޭ ބައްޔެކެވެ. ސިއްހީ ތަޖުރިބާކާރުން ބުނާ ގޮތުގައި، ބަލިޖެހިފައިވާ މީހަކު ކެއްސައި ކިނބިހި އަޅާއިރު ބޭރުވާ ވައިރަހުގެ ސަބަބުން، އޭނާއާ އެކު އުޅޭ މީހުންގެ ތެރެއިން 90 ޕަސެންޓް މީހުންނަށް ބަލި ޖެހުމުގެ ފުރުސަތު އޮވެއެވެ.
އެހެންކަމުން ބަލިން ރައްކާތެރިވުމަށް ވެކްސިން ފުރިހަމަ ކުރުމަކީ އެންމެ މުހިންމު ފިޔަވަޅުކަމަށް ސިއްހީ އިދާރާތަކުން ފާހަގަކުރެއެވެ.
