ޅ. ނައިފަރުން ވީނުވީއެއް ނޭނގި ގެއްލިގެން ރިޕޯޓުކޮށްފައިވާ 17 އަހަރުގެ ފިރިހެން ކުއްޖަކު ހޯދުމުގެ މަސައްކަތް ފުލުހުން ފަށައިފިއެވެ.
ގެއްލިގެން ހޯދަމުންދަނީ ޅ. ނައިފަރު / ނޫކަނޑު، މުހައްމަދު އަހްޔާން ހުސައިން (17އ) އެވެ.
ފުލުހުން ބުނީ، އަހްޔާން ގެއްލިގެން ނައިފަރު ޕޮލިސް ސްޓޭޝަނަށް އާއިލާގެ ފަރާތުން ރިޕޯޓުކޮށްފައިވަނީ ސެޕްޓެމްބަރު 28 ވީ އާދީއްތަ ދުވަހުގެ ހަވީރު 5:30 އެހައިކަންހާއިރު ކަމަށެވެ.
އަދި އޭނާ އެންމެ ފަހުން ފެނިފައިވަނީ ސެޕްޓެމްބަރު 27 ވަނަ ދުވަހު ކަމަށާއި، އޭގެ ފަހުން އެއްވެސް ހަބަރެއް ނުވެގެން ފޯނަށް ގުޅުމުން ޖަވާބު ނުދޭތީ، އާއިލާއިން އޭނާ ހޯދުމަށް ކުރި މަސައްކަތުން ވެސް ފެނިފައިނުވާ ކަމަށް އާއިލާއާ ހަވާލާދީ ފުލުހުން މައުލޫމާތު ދެއެވެ.
އަޙްޔާން ހޯދުމުގެ މަސައްކަތް ފުލުހުން މިހާރު ދަނީ ކުރަމުންނެވެ.
އެހެންކަމުން، މުހައްމދު އަހްޔާން ހުސައިންއާ ބެހޭ އެއްވެސް މަޢުލޫމާތެއް ލިބިފައިވާ ފަރާތެއް ވާނަމަ، ލަސްނުކޮށް ޅ. ނައިފަރު ޕޮލިސްގެ ނަންބަރު 9792187 އަށް ނުވަތަ ފުލުހުންގެ ހޮޓްލައިން ނަންބަރު 3312111 އަށް ގުޅާ އެ މައުލޫމާތެއް ހިއްސާކޮށްދިނުމަށް ފުލުހުން ވަނީ އެދިފައެވެ.
