ރާއްޖޭގައި ފުޅާ ދާއިރާއެއްގައި އިންޝިއުރެންސްގެ ހިދުމަތް ދެމުން އަންނަ އެލައިޑް އިންޝިއުރެންސް އިން އަނެއްކާވެސް ކޭޝްލެސްގެ ހިދުމަތް ދޭން ފަށައިފިއެވެ.
ޕްރައިވެޓް އިންޝުއަރެންސެއް އޮތް ނަމަ އެ އިންޝުއަރެންސްގެ ލިމިޓް ހަމަވުމުން ނޫން ގޮތަކަށް އާސަންދަ ދޫނުކުރަން ނިންމި ނިންމުމާ ގުޅިގެން އެލައިޑް ހިމެނޭހެން އަމިއްލަ ބައެއް ކުންފުނިތަކުން ވަނީ ކޭޝްލެސްގެ ހިދުމަތް ހުއްޓާލާފައެވެ.
އެއާއެކު ގިނަ އަދަދެއްގެ އާންމުން އެކަމާ ކަންބޮޑުވުން ފާޅުކޮށް ސޯޝަލް މީޑިއާގެ އެކި މަންސަތަކުގައި ވާހަކަ ދައްކަމުންދާ މި ދަނޑިވަޅުގައި އެލައިޑުން މި ވަނީ އެ ކުންފުނީގެ ނިންމުން ބަދަލުކޮށްފައެވެ. އެ ހިދުމަތް އިއާދަ ކުރިކަން އަންގާ އެލައިޑުން ސޯޝަލް މީޑިއާގައި ހިއްސާ ކުރި ޕޯސްޓެއްގައި ބުނީ، އައުޓްޕޭޝަންޓް ހިދުމަތް ހޯދާ މީހެއްގެ ލިމިޓް ހަމަވަންދެން ކޭޝްލެސްކޮށް ހިިދުމަތް ދޭނެ ކަމަށެވެ.
އާސަންދަ ސްކީމް ރިފޯމް ކުރުމުގެ މަސައްކަތުގެ ތެރެއިން އައުޓް ޕޭޝަންޓްގެ ހިދުމަތްތަކަށް ބިލްކުރުމުގައި ޕްރައިވެޓް އިންޝުއަރެންސަށް އިސްކަންދިނުމަށް ނިންމާ، ފުލުހުންނާއި ސިފައިން ފިޔަވައި އެހެނިހެން އިންޝުއަރެންސް ތަކުން ކަވަރުކުރާ ހިދުމަތްތަކަށް އާސަންދަ ދިނުން ސަރުކާރުން ހުއްޓާލީ މިމަހުގެ އެއްވަނަ ދުވަހުއެވެ.
އަދި އެކަމާ ގުޅިގެން ގިނަބަޔަކު ވަނީ ސަރުކާރަށް ވަރަށް ބޮޑަށް ފާޑުވެސް ކިޔާފައެވެ. އެއާއެކު އާސަންދައިން މިއަދު ބަޔާނެއް ނެރެ، އަމިއްލަ އިންޝުއަރެންސް ޕޮލިސީއިން ކަވަރޭޖް ނުލިބި، އަމިއްލަ ޖީބުން ފައިސާ ދައްކަން ޖެހޭ ހުރިހާ ހާލަތެއްގައި، ކުރިއެކޭ އެއްގޮތަށް އާސަންދަ ކަވަރޭޖު ލިބޭނެކަން އިއުލާން ކޮށްފައެވެ.
މިފަދަ ދަނޑިވަޅެއްގައި ކަމުގެ ހަގީގަތް އޮޅޭ ގޮތަށް އެކި ފަރާތްތަކުން ދޮގު މައުލޫމާތު ހާމަކުރަމުން ދާތީ ކަންބޮޑުވުންފާޅުކޮށް އެންސްޕާއިން ވަނީ މިކަމާއި ގުޅޭ ގޮތުން އިތުރު މައުލޫމާތު ސާފުކުރުމަށް ވެސް އިލްތިމާސްކޮށްފައެވެ.
