ލޯކަލް ޓޫރިޒްމުން ލިބޭ ޓެކްސްގެ ވަކި ޕަސެންޓެއް ކައުންސިލް ތަކަށް ލިބޭ ގޮތަށް ގާނޫނަށް އިސްލާހެއް ގަނައުމަށް ނިންމާފައިވާ ކަމަށް ރައީސުލްޖުމްހުރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
"އޮޅު ހިޔާ" ޕެޓް ކެއާ ފެސިލިޓީ ހުޅުވުމަށް ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ ކައުންސިލްތައް ބާރުވެރިކުރުވައި ކައުންސިލްތަކުގެ ހިންގުން ހަރުދަނާ ކުރުމަށް މަގުފަހިކުރުމަށް ކުރައްވާ މަސައްކަތްޕުޅުތަކުގެ މައްޗަށް އަލިއަޅުއްވާލައްވާފައެވެ.
އެގޮތުން ކައުންސިލްތަކަށް ލިބޭ އާމްދަނީ އިތުރުކުރުމަށް ކައުންސިލްތަކަށް ފަޅުރަށްތައް ލިބޭނެ މަގުފަހިކޮށް ދެއްވުމާއި، ލޯކަލް ޓޫރިޒަމްގެ ތެރެއިން ލިބޭ ޓެކްސްގެ ވަކި ޕަސެންޓެއް ކައުންސިލްތަކަށް ޖަމާކޮށްދިނުމަށް ނިންމާމަވާފައިވާކަމަށް ރައީސް ވިދާޅުވިއެވެ. ބެޖެޓުގެ ތެރެއިން ބްލޮކް ގްރާންޓުގެ 5 ޕަސެންޓު ދިނުމަށާއި ލޯކަލް ޓޫރިޒަމްގެ ތެރެއިން ލިބޭ ޓެކްސްގެ ވަކި ޕަސެންޓެއް ކައުންސިލުތަކަށް ލިބޭގޮތް ހެދުމަށް ގާނޫނަށް އިސްލާހު ގެނައުމަށް ފޮނުއްވާނެ ކަމަށް ވެސް ރައީސް ވިދާޅުވިއެވެ.
މީގެ އިތުރުން ގާނޫނުގައި ލިޔެފައި ހުރި، މިއަދާ ހަމައަށް ނުކޮށް ހުރި ކަންތައްތައް ކުރިއަށް އޮތް ހަފުތާއެއް ނުވަތަ ދެ ހަފުތާއެއްގެ ތެރޭގައި ކައުންސިލްތަކަށް ހަވާލުކުރުމަށްޓަކައި ވަޒީރުންގެ މަޖިލީހުގައި މަޝްވަރާތައް ހިންގަމުންދާ ކަމުގައި އެމަނިކުފާނު ވިދާޅުވިއެވެ.
މި ރަސްމިއްޔާތުގައި ވާހަކަފުޅު ދައްކަވަމުން މުއިއްޒު ވިދާޅުވީ، ކައުންސިލްތައް ލާމަރުކަޒީ ނިޒާމުގެ ތެރެއިން ބާރުވެރިކުރުވައިގެން ކައުންސިލްތައް މެދުވެރިކޮށް ކަންތައްތައް ކުރުމުގައި މި ސަރުކާރުން ގެންދަނީ އަމަލާ ބަހާ ދިމާކުރަމުން ކަމަށެވެ. އަދި މިއަދު ހުޅުވި "އޮޅު ހިޔާ" އަކީ އެކަމުގެ ނަތީޖާއެއް ކަމުގައި މުއިއްޒު ވިދާޅުވިއެވެ.
