ބާރު ސްޕީޑުގައި ދުއްވާފައި ދިޔަ ސައިކަލެއް މަޑުކުރަން ބުނުމުން، މަޑުނުކޮށް ފުލުހެއްގެ ގައިގައި ސައިކަލުން ޖެއްސި މައްސަލައިގައި މީހަކު ހައްުޔަރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ ހދ. ކުޅުދުއްފުށި، މިލްކުރާގެ، އަހުމަދު ޝަހީން ޝާހިދު (18އ)އެވެ.
ފުލުހުން ބުނީ ރޭ 10:42 ހާއިރު ހުޅުމާލޭ ރީތިގަސް މަގުން ބާރު ސްޕީޑްގައި ދުއްވި ސައިކަލެއް މަޑުކުރަން ބުނުމުން، މަޑުނުކޮށް ދާން މަސައްކަތްކޮށްފައިވާ ކަމަށެވެ. އަދި އެ ސައިކަލެއް ހުއްޓުވަން އުޅުމުން ފުލުސް މީހާ ގައިގައި ސައިކަލު ޖައްސައި ފުލުހުންގެ ދައުރު އަދާކުރުމަށް ހުރަސް އަޅައި ފިލަން މަސައްކަތްކޮށްފައިވާކަމަށް އެ އިދާރާއިން ވަނީ ބުނެފައެވެ.
އިތުރަށް ފުލުހުން ބުނީ މި ހާދިސާގައި އަނިޔާވި ފުލުސް މީހާއަށް ހޮސްޕިޓަލުގައި ފަރުވާ ދިނުމަށްފަހު ދޫކޮށްލާފައިވާ ކަމަށެވެ. އަދި އަހުމަދު ޝަހީން އަކީ ލައިސެންސް ނެތް މީހެއްކަން ފާހަގަކޮށް ފުލުހުން ވަނީ މި މައްސަލަ އިތުރަށް ބަލަމުން އަންނަކަމަށް ބުނެފައެވެ.
