މިދިޔަ ބުދަ ދުވަހުގެ ރޭ ބޭއްވި "11 ވަނަ ނޫސްވެރިކަމުގެ އެވޯޑްގެ" އޯޑިއޯ ވީޑިއޯ ކެޓަގަރީގެ ތަހުގީގީ ނޫސްވެރިކަމުގެ އިނާމު ދީފައި ވަނީ މޯލްޑިވްސް މީޑިއާ ކައުންސިލްގެ އެވޯޑް ދިނުމުގެ އުސޫލާއި މަގުސަދުތަކާ ހިލާފަށް ކަމަށް އެ އެވޯޑްތަކަށް އިންސާފު ކުރި ފަނޑިޔާރުން ބުނެފިއެވެ.
މިކަމާ ގުޅިގެން ފަނޑިޔާރުންގެ ޓީމުން ނެރުނު ބަޔާނެއްގައި ބުނީ ތަހުގީގީ ނޫސްވެރިކަމުގެ އެވޯޑް ދީފައިވާ އުފެއްދުމަކީ ދިވެހި މީޑިއާގެ އަހްލާގީ މިންގަނޑުގައި ބަޔާން ކޮށްފައިވާ އުސޫލުތަކަށް ބެލުމެއް ނެތި ޝާއިއު ކޮށްފައިވާ ކޮންޓެންޓެއް ކަމަށެވެ. އަދި މޯލްޑިވްސް މީޑިއާ ކައުންސިލް (އެމްއެމްސީ) އަށް އެކަން ފާހަގަވެ، އެކަން އެގޮތަށް ނުކުރުމަށް ސެޕްޓެމްބަރު 28، 2023ގައި ޝާއިއު ކުރި އެ ކައުންސިލުގެ ނޫސް ބަޔާނުން އެނގެން އޮތްކަން އެ ބަޔާނުގައި ވަނީ ފާހަގަ ކޮށްފައެވެ.
ފަނޑިޔާރުންގެ ޓީމުން ބުނީ އެ އުފެއްދުން ބަލައިގަނެ، އެވޯޑަށް ނޮމިނޭޓްކޮށް، ފަނޑިޔާރުންގެ މޭޒަށް ހުށަހަޅާފައި ވަނީ އެމްއެމްސީގެ ކައުންސިލުން ބަލަންވާ ވަރަށް ނުބަލައި ކަމަށެވެ. އެހެންކަމުން އެ އުފެއްދުން ކައުންސިލުން ބަލައިގަތް ނިޔަތާމެދު ސުވާލު އުފެދޭ ކަމަށެވެ.
މިކަމާ ގުޅޭގޮތުން ފަނޑިޔާރުން އުފެއްދި ސުވާލުތަކަށް ކައުންސިލުން ޒިންމާދާރު ކަމާއެކީ ޖަވާބުދާރީވެފައި ނުވާ ކަމަށް ފަނޑިޔާރުގެ ޓީމުން ވަނީ ބުނެފައެވެ.
އޯޑިއޯ، ތަހުގީގީ ނޫސްވެރިކަމުގެ އެވޯޑަށް އިންސާފު ކުރުމަށް ފަނޑިޔާރުންނަށް ދީފައިވާ ރުބްރިކްގައި ތަހުގީގީ ނަޒަރަކުން އުފެއްދުމަށް އިންސާފު ކުރެވޭނޭ ގޮތް ވަރަށް ހަނިކޮށްފައި އޮތް ކަމަށް ފަނޑިޔާރުންގެ ޓީމުން ބުނެއެވެ. އެގޮތުން ރުބްރިކުގައި 80 ޕަސެންޓް ފަރުމާކޮށްފައި އޮތީ ވީޑިއޯ އުފެއްދުމުގެ ޓެކްނިކަލް ކޮލިޓީސް ތަކަށް މާކްސް ދޭންޖެހޭ ގޮތަށް ކަމަށާއި އެހެންކަމުން ތަހުގީގީ ނޫސްވެރިކަމުގެ ނަޒަރިއްޔާތަކުން މާކްސް ދެވޭނެ އެއްވެސް ގޮތެއް ނެތް ކަމަށް ފަނޑިޔާރުންގެ ޓީމުން ވަނީ ބުނެފައެވެ.
ފަނޑިޔާރުންގެ ޓީމުން އިތުރަށް ބުނީ ހުށަހަޅާފައިވާ ހުރިހާ އުފެއްދުންތައް އެވޯޑްސްގެ ޖުމުލަ ފަނޑިޔާރުންގެ ޕެނަލަށް ހިއްސާ ކޮށްފައިނުވާ ކަމަށެވެ.
މީގެކުރީ އަހަރުތަކުގައި ފަނޑިޔާރުންގެ ނިންމުންތައް، ކައުންސިލާ ހަވާލުކުރުމުގެ ބަދަލުގައި މާކްސްދީ ނިމުމުން ހަވާލުކުރަނީ ސިޓީ އުރައިގައި ބަންދުކޮށް، ސީލްކޮށް އެކަމަށް ކަނޑައަޅާފައިވާ އޮޑިޓް ފާމަށްކަން ފާހަގަކޮށް ފަނޑިޔާރުންގެ ޓީމުން ބުނީ މިފަހަރު މިއިން އެއްވެސް ކަމެއްކޮށްފައި ނުވާ ކަމަށެވެ.
އޯޑިއޯ ވީޑިއޯ ކެޓަގަރީގެ ތަހުގީގީ ނޫސްވެރިކަމުގެ އިނާމު ދީފައި ވަނީ، ނިމިދިޔަ ރިޔާސީ އިންތިހާބާ ދިމާކޮށް ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ އަބުރުފުޅަށް ހުތުރުވާގޮތަށް 'އަދަދު' ނޫހުން ތައްޔާރު ކުރި 'ސްކީލާން' ރިޕޯޓަށެވެ.
