ހުޅުމާލޭގެ ދެވަނަ ފިޔަވަހީގައި ހުރި ކަރަންޓު ޓްރާންސްފޯމަރަކުން ވައްކަން ކުރަން ވަން މީހާގެ ބަންދަށް 30 ދުވަސް ޖަހައިފިއެވެ.
މި މައްސަލައިގައި ފުލުހުން ހައްޔަރުކޮށްފައިވަނީ ނ.މާޅެންދޫ، ފެހި އައްސޭރި، އަހްމަދު ރިސްފާން (32އ) އެވެ.
ފުލުހުން ބުނީ އަހްމަދު ރިސްފާން ހައްޔަރުކޮށްފައިވަނީ، މި މަހުގެ 27 ވަނަ ދުވަހު ފަތިހު 5:30 ހާއިރު ހުޅުމާލެ ފޭސް2 ގެ ހިޔާ 13 ފްލެޓް ކައިރީގައި ހުރި ޓްރާންސްފޯމަރެއްގެ ތެރެއަށް ވަދެ ވައްކަން ކުރަން އުޅުނު ކަމަށް ލިބުނު ރިޕޯޓަކާއި ގުޅިގެން ކަމަށެވެ.
އޭނާގެ ބަންދަށް އެންމެ ފުރަތަމަ ޖެހި 3 ދުވަސް ހަމަވުމާއި ގުޅިގެން ބަންދާއި މެދު ގޮތެއް ނިންމުމަށް ކޯޓަށް ހާޒިރު ކުރުމުން ކޯޓުން އޭނާގެ ބަންދަށް އިތުރު 30 ދުވަސް ޖަހާފައިވާ ކަމަށެވެ.
މި މައްސަލަ ފުލުހުން ދަނީ އިތުރަށް ތަހުގީގުކުރަމުންނެވެ.
