ބޭރު ގައުމުތަކުގައި ކިޔަވާ ދިވެހި ދަރިވަރުންގެ ތެރެއިން 1،200 ޑޮލަރަށް ޑޮލަރު ލިމިޓު ބޮޑުކުރަން ބޭނުންވާ ދަރިވަރުންނަށް ބީއެމްއެލުން ޕޯޓަލެއް ހަމަޖައްސައިފިއެވެ.
އެކަން ހާމަކޮށް ބީއެމްއެލުން ބުނީ، ޑޮލަރު ލިމިޓް ބޮޑުކުރުމަށްޓަކައި ޕާސްޕޯޓުގެ ކޮޕީއަކާއި ދަރިވަރުގެ ވިސާ އާއި ޔުނިވާސިޓީގައި އެ ދަރިވަރު ކިޔަވަމުންދާ ކަމުގެ ލިޔުމެއް ބޭނުންވާނެ ކަމަށެވެ. އެ ލިޔުމުގައި ދަރިވަރުގެ މައުލޫމާތުގެ އިތުރުން ދަރިވަރު ކިޔަވާ ކޯހުގެ މައުލޫމާތު އޮންނަން ޖެހޭނެ ކަމަށް ބީއެމްއެލުން ބުންޏެވެ.
ޕޯޓަލްގައި ރަޖިސްޓްރީވެ ޑޮލަރު ލިމިޓު ބޮޑުކުރުމަށް ދަރިވަރުން ހުށަހެޅުމުން، ވިޔަފާރި އެއް ދުވަހުގެ ތެރޭ ޑޮލަރު ލިމިޓު ބޮޑުކޮށްދޭނެ ކަމުގެ ޔަގީންކަން ބީއެމްއެލުން ދެއެވެ. އޭގެ ފަހުން ބީއެމްއެލްގެ މޯބައިލް އެޕްލިކޭޝަނަށް ނޮޓިފިކޭޝަން ލިބޭނެ ކަމަށް ވެސް ބޭންކުން ބުންޏެވެ.
އަދި މި ލިމިޓުގެ ތެރެއިން، އެހެން ގައުމުތަކުގައި ބޭނުންކުރުމަށް 250 ޑޮލަރުގެ ލިމިޓެއް ލިބޭނެ ކަމަށް ވެސް ބީއެމްއެލުން ބުންޏެވެ.
ބޭރު ގައުމުތަކުގައި ކިޔަވާ ދިވެހި ދަރިވަރުންގެ ލިމިޓު ބީއެމްއެލުން ބޮޑުކުރީ މިދިޔަ މަހުގެ 23 ވަނަ ދުވަހުގައެވެ.
ބީއެމްއެލުން ބުނީ، ޑޮލަރު ލިބުމުގައި ދަތިކަމެއް ހުރި ނަމަވެސް ދަރިވަރުންގެ ލިމިޓު ބޮޑުކުރަން ނިންމީ، ދަރިވަރުންގެ މާލީ ބޭނުންތަކަށް އިސްކަންދީ އެކަމަށް ރިއާޔަތްކުރުމަށް ފަހު ކަމަށެވެ.
