ސަރުކާރުން އަޅަމުންދާ ހަރަދު ކުޑަކުރުމުގެ ފިޔަވަޅުގެ ދަށުން 248 ސިޔާސީ މުވައްޒަފަކު މިހާތަނަށް ވަކިކޮށްފައިވާ ކަމަށް، ރައީސް އޮފީހުގެ އިސްތަރުޖަމާނު ހީނާ ވަލީދު ވިދާޅުވެއްޖެއެވެ.
މިދިޔަ މަހުގެ މެދުތެރޭގައި ވެސް 228 ސިޔާސީ މުވައްޒަފަކު ވަޒީފާއިން ވަކިކޮށްފައިވެއެވެ. އޭގެ ތެރޭގައި ހަތް ސްޓޭޓް މިނިސްޓަރަކާއި 43 ޑެޕިއުޓީ މިނިސްޓަރަކާއި 109 ސީނިއާ ޕޮލިޓިކަލް ޑިރެކްޓަރުންނާއި 69 ޕޮލިޓިކަލް ޑިރެކްޓަރުން ހިމެނެއެވެ.
'އެކްސް'ގައި ހީނާ ލިޔުއްވި ގޮތުގައި އިއްޔެ އާ ހަމައަށް 248 ސިޔާސީ މުވައްޒަފުން ވަކިކޮށްފައިވެއެވެ. އެކަމަކު އޭގެ ތަފްސީލެއް ހާމަ ނުކުރައްވައެވެ.
"ހަމަ އެއާއެކު ސިޔާސީ މުވައްޒަފުންގެ މަސައްކަތުގެ ފެންވަރު ބަލާ، ކުރުންތެރިކަން އިތުރު ކުރުމަށް ސިޔާސީ މުވައްޒަފުންގެ ޕަފޯމަންސް ބަލާނެ ނިޒާމެއް ގާއިމްކުރުމަށް ކެބިނެޓުން މިހާރު ވަނީ ނިންމާފައި. މިނިޒާމަށް ވަރަށް އަވަހަށް އަމަލުކުރަން ފަށާނެ،" ހީނާ ލިޔުއްވާފައިވެއެވެ.
އެހެންކަމުން މިދިޔަ މަހުގެ 15 ދުވަހުން ފެށިގެން އިއްޔެގެ ނިޔަލަށް 20 މުވައްޒަފަކު ވަކިކޮށްފައިވެއެވެ.
ކޮންމެ ސަރުކާރެއް ވެސް ހިންގުމަށްޓަކައި ސިޔާސީ މަގާމުތަކަށް ގިނަ އަދަދެއްގެ ބަޔަކު އައްޔަންކުރެއެވެ. ނިމިދިޔަ އެމްޑީޕީގެ ސަރުކާރުގައި ވެސް ސިޔާސީ މަގާމުތައް ހާހުން މަތިވެގެން ދިޔައެވެ. މި ސަރުކާރުގައި ވެސް ގިނަ ސިޔާސީ މުވައްޒަފުން އައްޔަންކުރި ކަމުގައިވީ ނަމަވެސް، ސަރުކާރުން ވަނީ އެކި ފަހަރު މަތިން މަގާމުގެ އަދަދުތައް ހާމަކުރުމަށް އުޒުރުވެރި ވެފައެވެ.
ސިޔާސީ މަގާމުތަކުގެ އަދަދު ހާމަނުކުރުމާ ގުޅިގެން ސަރުކާރަށް ބައެއް ފަރާތްތަކުން ފާޑު ވެސް ކިޔާފައި ވެއެވެ.
