ފުލުހުންނާއި ސިފައިން ފިޔަވައި އެހެނިހެން އިންޝުއަރެންސް ތަކުން ކަވަރުކުރާ ހިދުމަތްތަކަށް މިއަދުން ފެށިގެން އާންމުންނަށް އާސަންދަ ދިނުން ހުއްޓާލައިފިއެވެ.
އިއްޔެ ނެރުނު ނޫސް ބަޔާނެއްގައި އާސަންދައިން ބުނީ އެ ކުންފުނީގެ ސްކީމްގެ ހިދުމަތްތައް ދިނުމަށްޓަކައި ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން ދީފައިވާ ލަފާގެ މަތިން އާސަންދަ ދޭ ގޮތަށް ބަދަލު ގެންނަން ނިންމާފައިވާ ކަމަށެވެ.
އެގޮތުން އައުޓްޕޭޝަންޓް، ނުވަތަ އެނދުމަތިނުކޮށް ދޭ ފަރުވާތަކަށް އާސަންދައިގެ ހިދުމަތް ފޯރުކޮށްދިނުމުގައި، ހިދުމަތް ހޯދާ ފަރާތުގެ އަތުގައި އަމިއްލަ އިންޝުއަރެންސެއް އޮންނަ ނަމަ އެ އިންޝުއަރެންސަށް އިސްކަން ދިނުމަށް ކްލިނިކްތަކާއި ހޮސްޕިޓަލްތަކަށް އަންގާފައިވާނެ ކަމަށް ބުނެފައިވެއެވެ.
ހަމަ އެހެންމެ، އެ ތަންތަނުން މެމޯ ތައްޔާރުކުރުމުގެ ކުރިން ހިދުމަތް ހޯދަން ދާ ފަރާތުގެ އަތުގައި އަމިއްލަ އިންޝުއަރެންސެއް އޮތްތޯ ނެތްތޯ ކަށަވަރުކުރުމަށާއި، އެ ތަންތަނުން ދޭ ހިދުމަތްތައް އަމިއްލަ އިންޝުއަރެންސުން ކަވަރުކުރާ ނަމަ އެ އިންޝުއަރެންސް ހަމަވަންދެން އެއަށް އިސްކަން ދިނުމަށް އެ ތަންތަނަށް އަންގާފައިވާނެ ކަމަށް ވެސް ބަޔާނުގައި ވެއެވެ.
އޭގެ އިތުރުން އަމިއްލަ އިންޝުއަރެންސާ އެކު އާސަންދަ އަށް ބިލު ނުކުރުމަށް ކްލިނިކްތަކާއި ހޮސްޕިޓަލުތަކަށް އަންގާފައިވާނެ ކަމަށް އާސަންދައިން ބުންޏެވެ.
އެކަމަކު އަމިއްލަ އިންޝުއަރެންސްގެ ދަށުން ނުލިބޭ ހިދުމަތްތަކުގެ ތެރެއިން އާސަންދަ ކަވަރުކުރާ ހިދުމަތްތައް ކްލިނިކްތަކާއި ހޮސްޕިޓަލުތަކަށް ދެވޭނެ ކަމަށާއި، އަމިއްލަ އިންޝުއަރެންސްގެ ކަވަރޭޖް ހަމަވިޔަސް އާސަންދައިން ކަވަރުކުރާ ހިދުމަތްތަކަށް އާސަންދަ ދެވޭނެ ކަމަށް ވެސް އެ ކުންފުނިން ބުންޏެވެ.
ނަމަވެސް ފުލުހުންނާއި ސިފައިންނަށް އާސަންދައިގެ އެންމެހާ ހިދުމަތްތައް ލިބޭނެ ކަމުގައި، އެ ކުންފުނީގެ ބަޔާނުގައިވެއެވެ.
އާސަންދައިން މިފަދަ ނިންމުމެއް ނިންމާފައި މި ވަނީ ސަރުކާރުން ހަރަދު ކުޑަކުރުމަށް އަޅާފައިވާ ފިޔަވަޅުތަކުގެ ސަބަބުން ހަތް ބިލިއަނެއްހާ ރުފިޔާ އަންނަ އަހަރު ސަލާމަތްކުރެވޭނެ ކަމަށް ސަރުކާރުގެ ފަރާތުން ބުނެފައިވަނިކޮށެވެ. އެގޮތުން ހަރަދުތައް ކުޑަކުރުމަށް ސަރުކާރުން އަޅަން ނިންމި ފިޔަވަޅުތަކުގެ ތެރޭގައި ސަބްސިޑީ ދޭ އުސޫލަށް ބަދަލު ގެނެސް، އާސަންދަ ދެމެހެއްޓެނިވި ނިޒާމަކަށް ބަދަލުކުރުން ހިމެނެއެވެ.
