ވަޅިން ބިރުދައްކާ އޮޅުވާލައިގެން ގެއަކަށް ގެންގޮސް ފޭރުނު މައްސަލައެއްގައި މީހަކު ހައްޔަރުކޮށްފިއެވެ.
ފުލުހުން ބުނީ މި މައްސަލައިގައި ހައްޔަރުކޮށްފައިވަނީ އުމުރުން 37 އަހަރުގެ މއ. ފޯޗިއުން، ފާތިމަތު އަލީ ކަމަށެވެ. ފުލުހުން ބުނީ އެ އަންހެން މީހާ ހައްޔަރުކޮށްފައިވަނީ އިއްޔެ 22:08 އެހައިކަންހާއިރު ކަމަށެވެ.
ފުލުހުން ބުނީ ފާތިމަތު އަލީ ވަނީ ބަންގްލަދޭޝް ރައްޔިތަކު މާލެ، ގަލޮޅު ގެއަކަށް އޮޅުވާލައިގެން ގެންގޮސް އޭނާއަށް ވަޅިން ބިރުދައްކައި ފޭރިފައިކަމަށެވެ. މި މައްސަލައިގައި އޭނާގެ ހައްޔަރާމެދު ގޮތެއް ނިންމުމަށް ކޯޓަށް ހާޒިރުކުރުމުން، 15 ދުވަހުގެ މުއްދަތަށް ބަންދުކުރުމަށް ކޯޓުން އަމުރު ކޮށްފައިވާ ކަމަށް ފުލުހުން ވަނީ ބުނެފައެވެ.
މީގެއިތުރުން ފާތިމަތު އަލީއާއެކު މި އަމަލު ހިންގުމުގައި އެހީތެރިވިކަމަށް ތުހުމަތުކުރެވޭ ދިވެހި ފިރިހެނަކު ހޯދުމުގެ މަސައްކަތް ކުރަމުންދާ ކަމަށްވެސް ފުލުހުން ވަނީ ބުނެފައެވެ.
ދާދިފަހުންވެސް މަންމައަށް އަނިޔާކޮށް ބިރުދައްކާ ފޯނެއް ފޭރިގަތް މީހަކު ފުލުހުން ހައްޔަރުކޮށްފައެވެ. އޮކްޓޫބަރު 22 ވަނަ ދުވަހު ހިނގި މި ހާދިސާގައި ފުލުހުން ހައްޔަރުކޮށްފައިވަނީ އުމުރުން 28 އަހަރުގެ ހ. އެހަޑަ، ކ.މާލެއަށް ނިސްބަތްވާ މުހައްމަދު އިސްމާއީލް އެވެ.
ހުޅުމާލެ ފޭސް 2 ގެ ހިޔާ ފްލެޓެއްގެ އެޕާޓްމެންޓަކުން އަންހެނަކު ރޯ އަޑު އިވޭކަމަށް ބުނެ ފުލުހުންނަށް ރިޕޯޓު ކުރުމާ ގުޅިގެން ފުލުހުން އެ އެޕާޓްމެންޓަށް ދިއުމުން އަންހެނަކު ދޮރު ހުޅުވިކަމަށް ފުލުހުން ވަނީ ބުނެފައެވެ. އެ އަންހެން މީހާއާއި ހަވާލާދީ ފުލުހުން ބުނީ އެ އަންހެން މީހާގެ ދަރިފުޅު މުހައްމަދު އިސްމާއީލް އޭނާއަށް އަނިޔާކޮށް ވަޅިން ހަމަލާދީ މަރާލާނެ ކަމުގެ އިންޒާރު ދީފައިވާ ކަމަށެވެ. އަދި އެ އަންހެން މީހާގެ ފޯނުވެސް ފޭރިގަނެފައިވާ ކަމަށް ފުލުހުން ވަނީ ބުނެފައެވެ.
މި މައްސަލަ އާއި ގުޅިގެން ކޯޓު އަމުރެއްގެ ދަށުން ފުލުހުން ވަނީ މުހައްމަދު އިސްމާއިލް ހައްޔަރުކޮށްފައެވެ.
