ދިވެހިރާއްޖޭގެ ގައުމީ ޔުނިވާސިޓީއަށް 2021 ވަނަ އަހަރު ލިބެންޖެހޭ ފައިސާގެ ބޮޑު ބައެއް ލިބިފައި ނުވާކަމަށާއި، އަދި އެތަނުގެ ކެންޓީނު ކުއްޔަށް ދޫކުރުމަށްފަހު ލިބެންޖެހޭ ފައިސާ ހަމައަށް ލިބިފައި ނުވާކަމަށް އޮޑިޓް ރިޕޯޓުން ދައްކައިފިއެވެ.
އޮޑިޓާ ޖެނެރަލް އޮފީހުން އާންމުކޮށްފައިވާ ރިޕޯޓުގައި ބުނެފައިވަނީ 2020 ވަނަ އަހަރު ޔިނިވާސިޓީގެ މާލީ ބަޔާން އޮޑިޓްކޮށްފައި ނުވާތީ 2021 ވަނަ އަހަރުގެ މާލީ ބަޔާނުގައިވާ 2020 ވަނަ އަހަރުގެ އަދަދުތަކަކީ އޮޑިޓްކޮށްފައިވާ އަދަދުތަކެއް ނޫންކަމަށެވެ. 2020 ވަނަ އަހަރު ޔުނިވާސިޓީގެ ބަޖެޓުން ހަރަދުކޮށްފައިވަނީ ދައުލަތުގެ މާލިއްޔަތު ގާނޫނާއި ގަވައިދާ އެއްގޮތަށްތޯ ބަލާފައިވާނެކަމަށެވެ. އަދި 2020 އަހަރު ޔުނިވާސިޓީ ބަޖެޓުން ހޭދަކޮށްފައިވަނީ މާލިއްޔަތު ގަވައިދާ އެއްގޮތަށް ކަމަށް އޮޑިޓް ރިޕޯޓްގައި ވަނީ ފާހަގަކޮށްފައެވެ.
އޮޑިޓް ރިޕޯޓުގައި ފާހަގަކޮށްފައިވާ މައްސަލަތައް:
- ޔުނިވާސިޓީގެ ފެކެލްޓީ އޮފް އެޑިއުކޭޝަންގެ ގޯތުތެރޭގައި ގާއިމުކޮށްފައިވާ ކެންޓީނު ކުއްޔަށް ދިނުމުގައި އެއްބްސްވެފައިވާ ގޮތަށް ގަވައިދުން ކުލި ނުދައްކާކަން ވަނީ ފާހަގަކޮށްފައެވެ.
- ކުލި ދެއްކުން ލަސްވުމާއި ގުޅިގެން ކުރަންޖެހޭ ޖޫރިމަނާ ނުކޮށް، ހަމައެކަނި ކުއްޔަށް ވާ ފައިސާ ނަގާފައިވާކަން ވަނީ ފާހަގަކޮށްފައެވެ.
- ކުލި ހޯދުމަށް ޔުނިވާސިޓީއިން، ކުއްޔަށް ނަގާފައިވާ ކުންފުންޏަށް ސިޓީ އާއި މެމޯ ފޮނުވާފައިވީ ނަމަވެސް ޑިސެންބަރު 31، 2021 ގެ ނިޔަލަށް ޔުނިވާސިޓީއަށް ލިބެންޖެހޭ 250،000 ރުފިޔާ ހޯދުމަށް އިތުރު އެއްވެސް މަސައްކަތެއްކޮށްފައެއް ނުވެއެެވެ. އަދި މި މައްސަލަ ޝަރީއަތަށް ހުށަހަޅާފައެއް ނުވެއެވެ.
- ޔުނިވާސިޓީގެ ފެކެލްޓީ އޮފް ހެލްތު އެންޑް ސައިންސްގައި ގާއިމުކޮށްފައިވާ ކެންޓީނު ކުއްޔަށް ދޫކޮށްފައިވާ މުއްދަތު ހަމަވުމުންވެސް އެތަން ހިންގުމަށް ކުއްޔަށް ނެގި ފަރާތުން އެއްވެސް އެއްބަސްވުމެއް ނެތި ތަން ބޭނުންކޮށްފައިވާކަން ވަނީ ފާހަގަކޮށްފައެވެ.
- މި މުއްދަތުގައި ޔުނިވާސިޓީއަށް އެއް މަހުގެ ކުލި ފިޔަވައި އެހެން އެއްވެސް މަހަކު ކުލި ދައްކާފައިނުވާއިރު، މި މުއްދަތުގެ ތެރޭގައި ޔުނިވާސިޓިއަށް ކުލީގެ ގޮތުގައި މަހެއްގެ މައްޗަށް 81،000 ރުފިޔާގެ ރޭޓުން ޖުމްލަ 1.89 މިލިއަން ރުފިޔާ ކުއްޔަށް ލިބިފައެއް ނުވެއެވެ.
- ފައިސާ އޮޑިޓްކުރި ތާރިހުގެ ނިޔަލަށް އެމްއެމްއޭގައި އޮންނަ ޕަބްލިކް ބޭންކު އެކައުންޓަށް ޖަމާކުރުމުގެ ބަދަލުގައި ކައުންސިލްގެ އިދާރާގެ ބޭންކުގައި ބަހައްޓާފައިވުން
- 2021 ވަނަ އަހަރު ޔުނިވާސިޓީއަށް ލިބެންޖެހޭ ފައިސާގެ ގޮތުގައި 44،465،139 ރުފިޔާ ހިމަނާފައިވީ ނަމަވެސް، ޔުނިވާސިޓީގެ ރެކޯޑްތަކުގައި ލިބެންޖެހޭ ފައިސާގެ ގޮތުގައި ހިމަނާފައިވަނީ 42،619،695 ކަން ވަނީ ފާހަގަކޮށްފައެވެ. އަދި މި ދެއަދަދުގައި 1،845،444 ރުފިޔާގެ ފަރަގު ހުރިކަން ވަނީ ފާހަގަކޮށްފައެވެ.
- ޔުނިވާސިޓީގެ ރެކޯޑްތަކުގެ ތެރޭގައި ހިމަނަން ނުޖެހޭ ފައިސާ ކަމަށްވާ ކިޔެވުން މެދުކަނޑާލާފައިވާ ދަރިވަރެއްގެ ފަރާތުން ލިބެންޖެހޭ 123،460 ރުފިޔާ ވަނީ ހިމަނާފައެވެ.
މީގެ އިތުރުން މި ރިޕޯޓުގައި ބުނެފައިވަނީ ޔުނިވާސިޓީގެ އާމްދަނީ އެކައުންޓުގައި ބޭންކާ ރިކޮންސައިލްކޮށްފައިވަނީ ޔުނިވާސިޓީގެ ކޭޝްބުކާއި ބޭންކާއި ދިމާނުވާ އަދަދާއި، ބޭންކު ޗާޖްގެ ގޮތުގައި ބަލައި އެ އަދަދު ހިމަނާފައިވާކަމަށް ވަނީ ފާހަގަކޮށްފައެވެ. އެގޮތުން 2021 ވަނަ އަހަރު ޗާޖްގެ ގޮތުގައި 701،165.02 ހިމަނާފައިވާކަން ވަނީ ފާހަގަކޮށްފައެވެ. ނަމަވެސް އެކި ފަރާތްތަކުން އޮންލައިންކޮށް ޔުނިވާސިޓީއަށް ހަދާފައިވާ ރަސީދުތަކުގެ އަދަދުތައް ވަކިވަކިން ބީއެމްއެލްގައި އޮންނަ އެކައުންޓަށް ޓްރާންސްފާވެފައިވާކަން ޔަގީންކުރަން ހަދަންޖެހޭ ރިކޮންސިލޭޝަން ހަދާފައިނުވާކަމަށްވަނީ ފާހަގަކޮށްފައެވެ.
މި ރިޕޯޓުގައި މާލިއްޔަތު ގާނޫނާއި ގަވައިދާއި އެއްގޮތަށް، ގައުމީ ޔުނިވާސިޓީއަށް ލިބެންޖެހޭ ފައިސާ ހޯދުމަށް ވަކި މުއްދަތެއް ދިނުމަށްފަހު އެ މުއްދަތުގެ ތެރޭގައި ފައިސާ ނުލިބިއްޖެ ނަމަ މައްސަލަ ޝަރީއަތަށް ހުށަހެޅުމަށް ވަނީ ލަފާދީފައެވެ.
