މަސްވެރިންނަށް ނުދެވި ހުރި ހުރިހާ ފައިސާއެއް މިއަދު ދޫކުރާނެ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ބުނެފިއެވެ.
މިފްކޯއިން ހާމަ ކުރި ތަފްސީލުތަކުން އިނގޭ ގޮތުގައި ސެޕްޓެމްބަރު މަހުގެ 27 ވަނަ ދުވަހުން ފެށިގެން މި މަހުގެ 27 ވަނަ ދުވަހުގެ ނިޔަލަށް މަސްވެރިންނަށް ދޭންޖެހޭ 15،168،344 ރުފިޔާ އެބަހުއްޓެވެ. ނަމަވެސް އެ ކުންފުންޏަށް ދިމާވެފައިވާ މާލީ ހާލަތާ ގުޅިގެން އެ ފައިސާ މަސްވެރިންނަށް ވަނީ ރައްދު ނުކުރެވިއެވެ.
އެއާއެކު ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއްޔެ ވަނީ މަސްވެރިންނަށް ނުދެވި ހުރި ފައިސާ، މަސްވެރިންނަށް ރައްދުކުރުމަށް އެ ފައިސާ މިފްކޯއާ ހަވާލުކޮށްފައިވާ ކަމަށް ވިދާޅުވެފައެވެ. އަދި ހަމައެހެންމެ މެނިފެސްޓޯގައިވާ ފަދައިން 48 ގަޑި އިރު ތެރޭގައި ދެމެހެއްޓެނިވި ގޮތެއްގައި ފައިސާ ދެވޭނޭ ނިޒާމު ގާއިމު ކުރުމުގެ މަސައްކަތް ކުރަމުންދާ ކަމަށް ވެސް އެމަނިކުފާނު އިއްޔެ ވަނީ ހާމަކުރައްވާފައެވެ.
މަސް ކިރާތާ 48 ގަޑިއިރުތެރޭ މަހަށްވާ ފައިސާ ދޫކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅަކަށް ވާއިރު މި ސަރުކާރު ވެރިކަމާ ހަވާލުވިއިރު މަސްވެރިންނަށް ނުދައްކާ ހުރި ގިނަ އަދަދެއްގެ ފައިސާ ނުލިބުމާއެކު މިދިޔަ ޖޫންމަހު މަސްވެރިން ވަނީ ވަރުގަދަ އިހުތިޖާޖު ތަކެއް ވެސް ކޮށްފައެވެ. އެ އާއެކު ސަރުކާރުގެ އެހީއާއެކު މިފްކޯއިން ވަނީ މަސްވެރިންނަށް ދޭންޖެހޭ ހުރިހާ ފައިސާއެއް ދައްކާ ހަލާސް ކޮށްފައެވެ.
އަދި ގަވާއިދުން ފައިސާ ދިނުމުގެ އިންތިޒާމު ހަމަޖެއްސުމަށް މިފްކޯއިން ވަނީ ބައިނަލްއަގްވާމީ ބާޒާރުގައި ގަނޑުކުރި ކަޅުބިލަމަހުގެ އަގު ހުރި މިންވަރަށާއި، މަސް ގަނެ އެކްސްޕޯޓުކުރުމަށް ހިނގާނޭ ހަރަދުތަކަށް ބަލައި ކޮންމެ ހަފްތާއަކު ވަކި އަގެއް ހަމަޖެއްސުމަށް ނިންމާ އެ އުސޫލުން ކަން ކުރަމުންނެވެ.
ނަމަވެސް މިދިޔަ އޮގަސްޓު މަހުވެސް ކިރުވި މަހަށްވާ ފައިސާ ނުލިބި މަސްވެރިން ވަނީ މުޒާހަރާކޮށްފައެވެ. އެއާއެކު އެފަހަރު ނުދެވި ހުރި 17 މިލިއަން ރުފިޔާ ވަނީ އޮޑިވެރިންނަށް ދީ ހަލާސްކޮށްފައެވެ.
