ޖިނާއީ މައްސަލަތަކުގައި ވާނުވާ ބަންދުގައި ބައިތިއްބާ މީހުންގެ ބަންދަށް ގެނެވެން އޮތް ހައްލަކީ ކަފާލާތުގެ ގާނޫނަށް އިސްލާހު ގެނައުން ކަމަށާއި އަދި ކޯޓުތަކުގެ ޝަރީއަތް އަވަސް ކުރުން ކަމަށް ބަންޑާރަ ނައިބު އަހްމަދު އުޝާމް ވިދާޅުވެއްޖެއެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އުޝާމް ވިދާޅުވީ، ވާނުވާ ބަންދު އުވާލުމަށް ކުރެވެން ހުރި ކަންކަން ބަލައި ދިރާސާ ކުރި ކަމަށާއި އެގޮތުން މި ވަގުތު ވާނުވާ ބަންދުގައި ތިބި މީހުން ކޮށްފައިވާ ކުށްތަކަށް ބަލާފައިވާ ކަމަށެވެ. މި ވަގުތު ބަންދުގައި ތިބި މީހުންނަކީ ބޮޑެތި ޖިނާއީ ކުށްތަކުގައި ބަންދުކޮށްފައި ތިބި މީހުންކަން ފާހަގަ ކުރައްވަމުން އުޝާމް ވިދާޅުވީ އެމީހުން މުޖުތަމައުއަށް ދޫކޮށްލުމަކީ އެކަމުގެ ސަބަބުން މުޖުތަމައުއަށް އެތައް ނޭދެވޭ އަސަރެއް ކުރާނެ ކަމެއް ކަމަށެވެ.
ވާނުވާ ބަންދުގައި ތިބި މީހުންގެ ކުށްތަކަށް ބަލާއިރު، ކުޑަކުދިންނަށް ޖިންސީ ގޯނާ ކުރުމުގެ މައްސަލަތަކާއި، ޓެރަރިޒަމްގެ ކުށުގެ މައްސަލަތަކާއި، މާރާމާރީގެ ބޮޑެތި މައްސަލަތަކާއި، މީހުން މެރުމުގެ އިތުރުން މަސްތުވާތަކެއްޗާ ގުޅޭ ބޮޑެތި މައްސަލަތަކުގައި ބަންދުކޮށްފައި ތިބި މީހުން ވާނުވާ ބަންދުގައި ތިބި ކަމަށް އުޝާމް ވިދާޅުވިއެވެ.
ވާނުވާ ބަންދަށް އޮތް އެއް ހައްލަކީ ކަފާލާތުގެ ގާނޫނަށް އިސްލާހު ގެނައުން ކަމަށް އުޝާމް ވިދާޅުވިއެވެ. މިހާރުވެސް ގާނޫނުގައި ކަފާލާތުގެ ވާހަކަ އަންނަ ކަމަށާއި އެ ވާހަކަ ގާނޫނައި އޮންނަނީ ވަރަށް ތިލަކޮށް ބަޔާންކޮށްފައި ކަން އުޝާމް ފާހަގަ ކުރެއްވިއެވެ. އެހެންކަމުން ރަނގަޅު ކަފާލާތުގެ ސިސްޓަމެއް ގާއިމް ކުރުމަށްޓަކައި ޖިނާއީ އިޖުރާއަތުގެ ގާނޫނަށް ގެންނަންޖެހޭ އިސްލާހުތަކެއް މިހާރު ވާނީ ރައްޔިތުންގެ މަޖިލީހަށް ހުށަހަޅާފައި ކަމަށް ވިދާޅުވިއެވެ.
އަދި މި ކަމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ފުރަތަމަ 14 ދުވަހުގެ ވައުދުފުޅުގެ ތެރޭގައި ހިމެނޭ ކަމެއް ކަން ފާހަގަ ކުރައްވައި، މި ސަރުކާރުގެ ފުރަތަމަ 14 ދުވަހުގެ ތެރޭގައި އެ އިސްލާހު ގެނައުމަށް މަޖިލީހަށް ހުށަހަޅާފައިވާ ކަމަށް ވެސް އުޝާމް ވިދާޅުވިއެވެ.
މީގެ އިތުރުން ވާނުވާ ބަންދާ މެދު ހުރި ކަންބޮޑުވުމަށް ފުރިހަމަ ހައްލެއް ގެނައުމަށް ޝަރީއަތްތައް އަވަސް ކުރުމަކީ ވެސް ވަރަށް ބޮޑަށް ކުރަން ޖެހިފައިވާ ކަމެއް ކަމަށް ވިދާޅުވިއެވެ. ޝާރިއާތްތައް ލަސްވާ މައްސަލައިގައި ކޯޓުތަކުން ބުނަނީ ބޭނުންވާ ރިސޯސަސް ނެތް ކަމަށާއި ޖާގައިގެ ދަތިކަން ކަމަށް އުޗާމް ވިދާޅުވިއެވެ. އެހެންކަމުން މި މައްސަލަ ހައްލު ކޮށް ދިނުމަށް މި ސަރުކާރުން މަސައްކަތް ފަށާފައިވާ ކަމަށް އުޝާމް ވިދާޅުވިއެވެ.
ޖިނާއީ ކުށުގެ މައްސަލަތަކުގައި އެންމެ ގިނަ ޝަރީއަތްތައް ކުރިއަށް ގެންދާ ކޯޓަކީ ކްރިމިނަލް ކޯޓު ކަމަށާއި އެ ކޯޓުގެ ޖާގައިގެ ދަތިކަމުގެ ވާހަކަ އަކީ އެތައް ޒަމާނެއް ވެއްޖެ ޝަކުވާއެއް ކަމަށް އުޝާމް ވިދާޅުވިއެވެ. އެކަން ހައްލު ކުރުމަށް ހުޅުމާލޭގައި ކްރިމިނަލް ކޯޓަށް އިމާރާތެއް އެޅުމުގެ މަސައްކަތް ކުރަމުން އަންނަ ކަން އުޝާމް ފާހަގަ ކުރެއްވިއެވެ.
ކަފާލާތަކީ ކޯޓުން ކަނޑައަޅާ ޝަރުތުތަކެއްގެ ދަށުން ނުވަތަ ކޯޓުން ކަނޑައަޅާ އަދަދަކަށް ކޯޓުގައި ފައިސާ ބެހެއްޓުމަށް ފަހު ބަންދު ދޫކުރާ އުސޫލެވެ. ޖިނާއީ އިޖުރައާތުގެ ގާނޫނު މިހާރު އޮންނަ ގޮތުން ކަފާލާތު ދެވެނީ ކުށުގެ ތުހުމަތުގައި ހައްޔަރު ކުރެވޭ މީހުންނަށް އެކަންޏެވެ.
އެ ގާނޫނަށް އިސްލާހު ގެންނަން ސަރުކާރުގެ ފަރާތުން މަނަދޫ ދާއިރާގެ ޕީއެންސީގެ މެންބަރު ހުސްނީ މުބާރަކް ހުށަހެޅުއްވި ބިލުގައިވާ ގޮތުން މީހެއްގެ މައްޗަށް އިއްވާފައިވާ ޖަލު ހުކުމެއް އިސްތިއުނާފް ކޮށްފިނަމަ އެ މައްސަލަ ނިމެންދެން ކަފާލާތުގެ ދަށުން އޭނާ ބަންދުން ދޫކުރެވިދާނެ އެވެ. ނަމަވެސް މީހުން މެރުމާއި ކުޑަކުދިންނަށް ޖިންސީ ގޯނާ ކުރުމާއި މަސްތުވާތަކެތި ޓްރެފިކް ކުރުން ފަދަ ބޮޑެތި ކުށްތައް ސާބިތުވެފައިވާ މީހުންނަށް ކަފާލާތު ނުދެވޭނެ ކަމަށް އެ ބިލްގައިވެ އެވެ.
އެ ބިލްގައިވާ ގޮތުން އިސްތިއުނާފް މަރުހަލާގައި ކުށްވެރިންނަށް ކަފާލާތު ދެވޭނީ އިސްތިއުނާފް މައްސަލާގައި އެކަށީގެންވާ އަސާސެއް އޮތުމާއި އަދި ކޯޓުން ކަނޑައަޅާ ޝަރުތުތަކަށް އަމަލު ކުރާނެ ކަމާއި އަދި އިތުރަށް ބަންދުކޮށްގެން ހާސިލްވާނެ މަސްލަހަތެއް ނެތްކަން އެ މީހާގެ ފަރާތުން ސާބިތުކޮށް ދިނުމުންނެވެ.
