ބިންވެރިޔާ ސްކީމްގެ ދަށުން ގުޅިފަޅުން ދޫކޮށްފައިވާ ގޯތި ލިބިފައިވާ ފަރާތްތަކުގެ ގުރުނެގުން ފަށައިފިއެވެ.
ގުޅިފަޅުގެ ލޭންޑް ޔޫސް ޕްލޭންއަށް އައިސްފައިވާ ބަދަލާގުޅިގެން، ކުރިން ގުޅިފަޅުން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަންތަކަށް ބަދަލު އަންނާނެ ކަމަށް ހައުސިން މިނިސްޓްރީއިން ވަނީ ބުނެފައެވެ.
ދަރުބާރުގޭ ރަންނަބަނޑޭރި މާލަމުގައި މިހާރު ވެސް ގުރުނެގުން ކުރިއަށްދާ އިރު، ގުނުނެގުން ފަށާފައި ވަނީ މިއަދު ހެނދުނު 9:00ގައެވެ. މި ގުރުނެގުމުގައި މިގުރުއަތުގައި މީގެކުރިން ގޯތީގެ ލޮކޭޝަން ދީފައިވާ މީހުންނާއި ގިރާވަރު ފަޅުން ލިބި، ގުޅީފަޅަށް ގޯތި ބަދަލުކުރި މީހުންގެ ގޯތީގެ ގުރުއަތުލުން ވެސް ކުރިއަށް ދާނެއެވެ.
ހިޔާވެހި ޕޯޓަލް މެދުވެރިކޮށް ގުރުނެގުމުގެ އަދާހަމަތައް ވަގުތުން ފެންނަމުންދާނެ ކަމަށް ހައުސިން މިނިސްޓްރީއިން ބުނެއެވެ.
ގުޅީފަޅުން ދޫކުރާ ގޯތީގެ އަދަދާއި ބޮޑުމިން:-
- 1250 އަކަފޫޓުގެ 669 ގޯތި
- 1650 އަކަފޫޓުގެ 1234 ގޯތި
- 2050 އަކަފޫޓުގެ 916 ގޯތި
- 2450 އަކަފޫޓުގެ 473 ގޯތި
- 2850 އަކަފޫޓުގެ 158 ގޯތި
- 3250 އަކަފޫޓުގެ 49 ގޯތި
- 3650 އަކަފޫޓުގެ 21 ގޯތި
ހައުސިން މިނިސްޓްރީން ބުނެފައި ވަނީ ގުޅިފަޅުގެ ބިން ލިބޭ ފަރާތްތަކުގެ ގުރުނެގުމުގެ ކަންކަން ކުރިއަށް ގެންދާނީ އެ މިނިސްޓްރީން އެކުލަވާލާފައިވާ ލިސްޓުގައިވާ ތަރުތީބުން، އެކަމަށް ކަނޑައަޅާފައިވާ އެ މިނިސްޓްރީގެ މުވައްޒަފުން ކަމަށެވެ. އަދި ބިން ލިބޭ ފަރާތެއްގެ ބަދަލުގައި އެހެން ފަރާތަކުން ހާޒިރުވާން ބޭނުންނަމަ، ބިން ލިބޭ ފަރާތުގެ އިއުތިރާޒެއްނެތް ކަމުގެ ލިޔުމަކާ އައިޑީކާޑްގެ ކޮޕީ އަކާއެކު ހާޒިރުވުމަށް އެދިފައެވެ.
