އާރްއެސްޑަބްލިޔު ސިސްޓަމް ނުވަތަ ލޮނުފެނުން މަސް ފިނިކުރާ ނިޒާމު އެޅުމަށް ދޫކުރާ ލޯނަށް، ނޮވެމްބަރު 17 ގެ ކުރިން އެދޭ ދޯނިތަކުގެ އިވޭލުއޭޝަން ފުރިހަމަކޮށް ފައިސާ ދޫކުރުމަށް ފިޝަރީސް މިނިސްޓްރީ އާއި އެސްޑީއެފްސީގެ ޓީމުން މަސައްކަތް ކުރަމުންދާކަމަށް މިނިސްޓަރު އަހްމަދު ޝިޔާމް ވިދާޅުވެއްޖެއެވެ.
ލޮނުފެނުން މަސް ފިނިކުރާ ނިޒާމު އެޅުމަށް ދޫކުރަން ނިންމާފައިވާ ލޯނާއި ގުޅޭ ގޮތުން މިނިސްޓަރު ވިދާޅުވީ މިއީ ސަރުކާރަކުން މިހާތަނަށް އޮޑިވެރިންނަށް ހުޅުވާލާފައިވާ އެންމެ ފަހި ފުރުސަތު ކަމަށެވެ. ސަރުކާރުގެ އަމާޒަކީ މަސްވެރިން ބާނާ މަސް ތާޒާކަންމަތީގައި ބެހެއްޓުމަށް އޮޑިވެރިންނަށް އެހީތެރިކަން ފޯރުކޮށްދިނުން ކަން ފާހަގަކޮށް މިނިސްޓަރު ވިދާޅުވީ މި ފެސިލިޓީގެ ސަބަބުން އޮޑިވެރިންނަށް ލިބޭނެ ފައިދާތަކުގެ ތެރޭގައި 35 ޕަސެންޓް ޑިސްކައުންޓެއް ލިބިގެންދާނެ ކަމަށެވެ. އަދި 2 މިލިއަން ރުފިޔާއާ ހަމައަށް ރަހުނަކާ ނުލައި ފެސިލިޓީ ހަމަޖެހިގެންދާނެ ކަމަށް މިނިސްޓަރު ވިދާޅުވިއެވެ.
މީގެ އިތުރުން، އާރްއެސްޑަބްލިޔު ސިސްޓަމާއެކު ބޭނުން ސައިޒެއްގެ ޖަނަރޭޓަރެއްވެސް ގަނެވޭނެ ކަމަށާއި، ފެސިލިޓީއަށް 6 މަސްދުވަހުގެ ގްރޭސް ޕީރިއަޑެއް ލިބިގެންދާނެ ކަމަށް މިނިސްޓަރު ވިދާޅުވިއެވެ. ފިޝަރީޒް މިނިސްޓްރީން ބުނީ މި މަޝްރޫއުގެ ދަށުން 100 ވަރަކަށް ދޯނީގައި އާރްއެސްޑަބްލިޔު ސިސްޓަމް އެޅުމަށް ލޯނު ދޫކުރުމަށް ހަމަޖެހިފައިވާ އިރު، ފެސިލިޓީ އަނބުރާ ދެއްކުން 10 އަހަރަށް ބަހާލެވޭނެ ކަމަށްވެސް މިނިސްޓަރުވަނީ ހާމަކޮށްފައެވެ.
މި ލޯނު ދޫކުރަން ނިންމާފައި ވަނީ އިސްލާމީ ޝަރީއާ ހަމަތަކުގެ މަތިން ތަކެތި ގަތް އަގާއި އަގަށް ފައިދާގެ ގޮތުގައި ލާ މިންވަރު ކަނޑައަޅައިގެން ކުރިޔަށް ގެންދާ ގޮތަށެވެ. މިނިސްޓްރީން ބުނެފައިވާ ގޮތުގައި މި މަޝްރޫއުގެ ދަށުން 700،000ރ. އިން ފެށިގެން 2،000،000ރ. އާ ހަމައަށް ލޯނު ދޫކުރާނެ ކަމަށެވެ. މި ލޯނަށް އެދުމުގެ ފުރުސަތު މިއަހަރުގެ ސެޕްޓެމްބަރު މަހުގެ ތެރޭގައި ހުޅުވާލާފައިވާއިރު، ލޯނަށް އެދި ހުށަހެޅޭނެ އެންމެ ފަހުގެ ތާރީހަކީ ނޮވެމްބަރު 30އެވެ.
