ރައްޔިތުންގެ މަޖިލީހުގެ ރައީސް، މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއާގެ މައްސަލައިގައި ހައްޔަރު ކޮށްފައިވާ ތަހުމީން އަހުމަދު ދިރިއުޅުނު ގެ ބަލައި ފާސްކުރި އިރު، 18 މެމޮރީ ކާޑާއި، ސައިކަލެއްގެ ނަންބަރު ބޯޑު ފެނިފައިވާ ކަމަށް ދައުލަތުގެ ހެކިވެރިއަކު ބުނެފިއެވެ.
މެއި 6، 2021 ގައި ރައީސް ނަޝީދު ދިރިއުޅުއްވި ގ. ކެނެރީގެ ކައިރީގައި ޕާކްކޮށްފައި ހުރި ސައިކަލެއްގައި އެއްޗެއް ގޮއްވާލި މައްސަލާގައި މިއަދު ކްރިމިނަލް ކޯޓުގައި ކުރިއަށް ގެންދިޔަ އަޑުއެހުމުގައި ވަނީ ދައުލަތުން ހުށަހަޅާ ދެ ހެކިންގެ ހެކި ބަސް ނަގާފައެވެ.
އެގޮތުން ފުރަތަމަ ހާޒިރުކުރި ހެކިވެރިޔާއަކީ މި މައްސަލައިގައި ދައުވާ އުފުލާފައިވާ ތަހުމީނު އަހުމަދު ދިރިއުޅޭ އެޕާޓްމަންޓް ބަލައި ފާސް ކުރުމުގައި ހަރަކާތްތެރިވެފައިވާ ފަރާތެކެވެ. އޭނާ ބުނީ، އެ ތަން ބަލައި ފާސް ކުރުމުގެ ތެރޭގައި މައިކްރޯއެސްޑީ 2 ކާޑުގެ އިތުރުން ބައެއް އިތުރު އިލެކްޓްރޯނިކްސް ފެނިފައިވާ ކަމަށެވެ. އަދި ލިއެކިއުންތަކަކާއި، އަތުން ލިޔެފައިވާ ހުތުބާއެއް ވެސް ފެނިފައިވާ ކަމަށް އޭނާ ބުނެއެވެ.
މީގެ އިތުރުން، ގޭގެ ސިޑިދަށުގައި ހުރި ކޮތަޅެއްގެ ތެރެއިން ކަޅު ކުލައިގެ ހެލްމެޓަކާއި ފަގުޑިއަކާއި 16 މެމޮރީ ކާޑު އަދި ސައިކަލެއްގެ ނަންބަރު ބޯޑެއް ވެސް ފެނިފައިވާ ކަމަށް އޭނާ ބުނެއެވެ. އެގޭގެ ގްރައުންޑް ފްލޯ ސިޑި ދަށް ބަލައި ފާސްކޮށްފައި ވަނީ ފުލުހުންނަށް ލިބުނު މައުލޫމާތަކާ ގުޅިގެން ކަމަށް ވެސް އެ ހެކިވެރިޔާ ބުނެފައި ވެއެވެ.
ދެވަނައަށް ހެކިބަސް ދިން ހެކިވެރިޔާއަކީ ތަހުމީނު އަހުމަދު ހައްޔަރު ކުރުމަށް ދިޔަ ޓީމުގައި ހިމެނޭ އޮފިސަރެކެވެ. ހަމައެއާއެކު އޭނާއަކީ ތަހުމީނު ދިރިއުޅޭ ގެ ބަލައި ފާސް ކުރުމުގައި ވެސް އޭނާ ހަރަކާތްތެރި ވެފައިވާ މީހެކެވެ.
މި މައްސަލަިއގައި މިއަދު ދައުލަތުން ހުށަހަޅާފައިވާ ހެކިވެރިންގެ ތެރެއިން ދެ ހެކިވެރިންގެ ހެކިބަސް ނަގާފައިވާ އިރު، އަދިވެސް ދައުލަތުގެ ހެކިވެރިންގެ ހެކިބަސް ނެގުން ކުރިއަށް އެބަ އޮތެވެ.
ރައީސް ނަޝީދަށް އަމާޒުކޮށް ދިން މި ހަމަލާގެ މައްސަލާގައި ދައުވާ ކުރަނީ ގއ. ކޮނޑޭ ފޮޅޭމާ ތަހުމީން އަހުމަދާއި، މއ. ފޭރުގޭ މުޖާޒް އަހުމަދާއި، ނ. މަނަދޫ ނޫރީގޭ އަލީ ހައިޝަމާއި، ގއ. ވިލިނގިލީ ހުދުރުވާގޭ ފަހުމީ އަލީ އާއި، މ. ކުދެހިގޭ އިސްހާގު އަދި އއ. މާޅޮސް، އަސަރީގޭ މުހައްމަދު ނާޒިމްގެ މައްޗަށެވެ.
މި މީހުންގެ ތެރެއިން ގޮއްވާލި ސައިކަލްގެ ވެރިމީހާ އަކީ ތަހުމީނެވެ. ފާތިހު އަކީ ނަޝީދަށް ހަމަލާދޭން އައިއީޑީ ހަރުކުރި ސައިކަލް އެތަނުގައި ބެހެއްޓި މީހާ ކަމަށް ފުލުހުން ބުނެފައި ވެއެވެ.
މި މައްސަލައިގައި ނަޝީދު އަވަހާރަކޮށްލަން ސައިކަލެއްގައި އައިއީޑީއެއް ހަރުކޮށް، ރިމޯޓެއް ބޭނުން ކޮށްގެން އެ އައިއީޑީ ގޮއްވާލީ އަދުހަމް ވަނީ އޭނާ ކުރި ކުށަށް އިއުތިރާފްވެފައެވެ. އަދި އޭނާއަށް ވަނީ 23 އަހަރުގެ ޖަލު ހުކުމެއް އިއްވާފައެވެ.
