ވިލިމާލެ ހޮސްޕިޓަލުގައި މުޅިން އަލަށް ދަތުގެ ފަރުވާގެ ހިދުމަތް ފަށައިފިއެވެ.
މި ހިދުމަތް ފަށްޓަވާ ދެއްވާފައި ވަނީ އިއްޔެ ރޭ ވިލިމާލޭ ހޮސްޕިޓަލުގައި ބޭއްވި ހާއްސަ ރަސްމިއްޔާތެއްގައި ހެލްތް މިނިސްޓަރު އަބުދުﷲ ނާޒިމް އިބްރާހީމެވެ.
އެ ހިދުމަތް ފަށްޓަވާ ދެއްވުމަށްފަހު އެ ހާއްސަ ހަފްލާގައި ވާހަކަ ދައްކަވަމުން ހެލްތް މިނިސްޓަރު ނާޒިމް ވިދާޅުވީ، މާލެ ސަރަހައްދުގެ ހުރިހާ ހޮސްޕިޓަލްތައް އެއް ނިޒާމެއްގެ ތެރެއިން ހިންގަވަން ނިންމެވި ނިންމުމަކީ ރައީސް ޑރ.މުހައްމަދު މުއިޒް ސިއްހީ ކަންތަށްތަކަށް ދެއްވާ އަހައްމިއްޔަތުކަން ދައްކުވައިދޭ ކަމެއް ކަމަށެވެ.
ރާއްޖެ ފަދަ ކުޑަ މުޖުތަމައެއްގައި އެއް ނިޒާމަކުން ގުޅިގެން ނޫނީ ސިއްހީ ހިދުމަތްތައް އެންމެ ފުރިހަމައަށް ނުދެވޭނެކަމަށްވެސް ނާޒިމް ވަނީ ވިދާޅުވެފައެވެ. އަދި އެއީ ރައީސް ފަށްޓަވާދެއްވި އާ ސަފުހާއެއް ކަމަށް އޭނާ ވިދާޅުވިއެވެ.
"ރާއްޖެ ފަދަ ކުޑަ، ހާއްސަކޮށް އާބާދީ އެއްފަސްވެފައިވާ މި އޮތް އޭރިއާގައި މި ނިޒާމް އެއް ނިޒާމަކުން ގުޅި ލާމެހިގެން ނޫނީ އަޅުގަނޑުމެންނަކަށް އެންމެ ރަނގަޅު ހިދުމަތެއް އަޅުގަނޑުމެންނަކަށް ފޯރުކޮށް ނުދެވޭނެ، އެހެންވީމަ އެއީ މުހިންމު ނިޒާމެއްގެ ގޮތުގައި ދެކެ ވަޑައިގެން އެ ނިޒާމް ތައާރަފް ކުރެއްވިކަން އެއީ އަޅުގަނޑު ދެކޭ ގޮތުގައި ވަރަށް މުހިންމު ކަމެއް،" ނާޒިމް ވިދާޅުވިއެވެ.
ވިލިމާލޭގައި ފެންވަރު ރަނގަޅު 100 އެނދުގެ ޓާޝަރީ ހޮސްޕިޓަލެއް އެޅުމަކީ ރައީސްގެ ވައުދުފުޅަކަށްވާއިރު އެ ހޮސްޕިޓަލްގެ އަމަލީ މަސައްކަތް އަންނަ އަހަރު ފެށުމަށް ވަނީ ނިންމާފައެވެ.
އެ މަޝްރޫއާއި ގުޅޭ އެންމެ ފަހުގެ މައުލޫމާތު ހިއްސާ ކުރައްވަމުން ނާޒިމް ވިދާޅުވީ، އެގޮތުން ހޮސްޕިޓަލުން ދެމުންދާ ހިދުމަތްތައް ބަދަލުކުރާނެ ތަނެއް މިހާރު ނިންމަވާފައިވާ ކަމަށާއި މިހާރު ކުރިއަށް ދަނީ އެތަނަށް ހިނގާނެ ހަރަދުތައް ހޯދުމުގެ ކަންކަން ކަމަށެވެ. އަދި އެ ހޮސްޕިޓަލްގެ މަސައްކަތް ކުރިއަށްދާނީ މިހާރު ދެމުންދާ ހޮސްޕިޓަލްގެ ހިދުމަތްތަކަށް ބުރޫ ނާރާނެ ފަދަ ގޮތަކަށް ކަމަށްވެސް ނާޒިމް ވިދާޅުވިއެވެ.
'ދަ ޕްރެސް' އަށް އެނގިފައިވާ ގޮތުގައި ޓާޝަރީ ހޮސްޕިޓަލް އެޅުމަށް ހަމަޖެހިފައި ވަނީ މިހާރުވެސް ހޮސްޕިޓަލް ހުރި ބިމުގައެވެ. އަދި ވިލިމާލެ ހޮސްޕިޓަލްގެ ހިންގުން ވަގުތީގޮތުން ކުޑަކުދިންގެ ހިޔާ ހިންގާ އިމާރާތަށް ބަދަލު ކުރުމަށް ނިންމާފައިވާ ކަމަށް ވެސް މި ނޫހަށް ވަނީ އެނގިފައެވެ. ޓާޝަރީ ހޮސްޕިޓަލް އެޅުމަށް ހަމަޖެހިފައި ވަނީ ޗައިނާއިން ދިން ހިލޭ އެހީގެ ދަށުންނެވެ.
