އަންނަ މަހުން ފެށިގެން ޑޮމެއިން ނަންބަރުތައް ވިއްކަން އަލުން ފަށައި، ދިމާވެފައިވާ މައްސަލަތައް ހައްލުކުރުމުގެ މަސައްކަތް ފެށުމަށް މަސައްކަތް ކުރަމުންދާ ކަން ޓްރާންސްޕޯޓް މިނިސްޓްރީން ހާމަކޮށްފިއެވެ.
އެކަން ހާމަކޮށް ނެރުނު ނޫސް ބަޔާނެއްގައި އެ މިނިސްޓްރީން މިއަދު ބުނީ، ޑޮމެއިން ނަންބަރުތައް ވިއްކުމުގެ ހިދުމަތް އަލުން ފެށުމަށްޓަކައި ކުރިމަތިވެފައިވާ އެންމެ ބޮޑު ދައްޗަކީ ވޭތުވެދިޔަ ތަނުގައި ޑޮމެއިންގެ ރެކޯޑުތައް ހަރުދަނާ ގޮތެއްގައި ބެލެހެއްޓިފައި ނެތުމާއި ހިދުމަތް ފޯރުކޮށްދިނުމުގައި އަމަލުކުރާނެ އުސޫލުތައް އެކުލަވާނުލާ އޮތުން ކަމަށެވެ
އެހެންކަމުން ޑޮމެއިންގެ ހިދުމަތް ދޭން އަލުން ފަށާއިރު ރެކޯޑުތައް ބަލަހައްޓާނެ ހަރުދަނާ ނިޒާމެއް ގާއިމްކޮށް، އެކަށީގެންވާ ހަރުދަނާ ގަވައިދެއް އެކުލަވާލައި، އެ ގަވައިދާ އެއްގޮތަށް ކަންކަން ބަދަލުވެގެން ދާނެ ކަމަށް ޓްރާންސްޕޯޓް މިނިސްޓްރީން ބުންޏެވެ. މީގެ އިތުރުން ޑޮމެއިންގެ ހިދުމަތް ފޯރުކޮށްދިނުމުގައި ދޫކުރެވޭ ލިޔުންތަކަކީ ސަލާމަތީގޮތުން ވަރުގަދަ ފީޗާތައް އެކުލެވޭ ލިޔުންތަކަކަށް ބަދަލުވެގެން ދާނެ ކަމަށް ވެސް އެ މިނިސްޓްރީން ބުންޏެވެ.
މިނިސްޓްރީގެ މަގްސަދަކީ ޑޮމެއިން ނަންބަރުތަކާ ގުޅިގެން ދިމާވެފައިވާ މައްސަލަތަކަށް ގާނޫނާއި ގަވައިދުގެ ތެރެއިން ހައްލު ހޯދައިދީ ވީހާ ވެސް ލުއިފަސޭހަކޮށްދިނުން ކަމަށް، އެ ބަޔާނުގައި ވެއެވެ.
ޓްރާންސްޕޯޓް މިނިސްޓަރު މުހައްމަދު އަމީން މީގެ ކުރިން ވިދާޅުވި ގޮތުގައި،
ޓްރާންސްޕޯޓް މިނިސްޓަރު މުހައްމަދު އަމީން ކުރިން ވިދާޅުވީ މިދިޔަ ސަރުކާރުން ވިއްކި ޑޮމެއިން ނަންބަރުތަކުގެ މައްސަލަ ހައްލުކުރައްވާނެ ކަމަށެވެ. މިނިސްޓަރު އޭރު ވިދާޅުވީ ރާއްޖޭގައި ބޭނުންކުރާ 1،400 އެއްހާ ޑޮމެއިންގެ ތެރެއިން ދެބައިކުޅަ އެއްބައި ޑޮމެއިން ނަންބަރު ސައްހަކަމަށާއި ބާކީ ނަންބަރުތައް ސައްހަނޫން ކަމަށެވެ.
