އަނބިދަރީންނަށް ހަރަދު ކުރުމަކީ ފިރިމީހާގެ މައްޗަށް ވާޖިބުވާ ކަމެއް ކަމަށާއި ހަރަދަށް އިހުމާލުވާނަމަ ހިސާބު ބައްލަވާ ދުވަހު އެމީހަކާ ސުވާލު ކުރެވޭނެ ކަމަށް މިއަދުގެ ހުތުބާގައި ބުނެފިއެވެ.
މިއަދުގެ ހުކުރު ހުތުބާ ހާއްސަކޮށްފައި ވަނީ "އަނބިދަރީންނަށް ހަރަދު ކުރުން" މި މައުޟޫގެ މައްޗަށެވެ. އަންހެނުންގެ ތެރޭގައި ހިމެނޭ ޝަރަފުވެރި އެއް ބަޔަކީ އަނބިމީހާ ކަމަށާއި މާތް ﷲ ވަނީ އަނބިމީހާއަށް ނަފަގާތު ދިނުމަށާއި ބޯހިޔާވަހިކަން ތަނަވަސްކޮށްދިނުމަށް ފިރިމީހާގެ މައްޗަށް އަމުރުކުރައްވާފައިވާ ކަމަށް ހުތުބާގައި ފާހަގަކޮށްފައި ވެއެވެ.
އަދި ތަފާތު މުނާސަބަތުތަކުގައި ތަފާތު ތަންތާނގައި އަނބިމީހާއަށް ހެޔޮކޮށް ހިތުމަށް މާތް ނަބިއްޔާވެސް ތަކުރާރުކޮށް އިރުޝާދު ދީފައިވާ ކަމަށް ބުނެފައި ވެއެވެ. ހަމަ އެހެންމެ އިސްލާމީ ޝަރީއަތުގައި ކަނޑައަޅުއްވައިފައިވާ ގޮތުން، ބައްޕަ އޭނާގެ ދަރީންނަށް ހަރަދުކުރުމަކީ، ފިރިހެން މީހާގެ މައްޗަށް މާތް ﷲ ވާޖިބުކުރައްވައިފައިވާ ކަމެއް ކަމަށް ހުތުބާގައި ބުނެފައި ވެއެވެ.
"އެހެންކަމުން ތިބާގެ އަނބިމީހާ ފުދުންތެރިއަކަށް ނުވަތަ މުއްސަންޖަކަށް ވިޔަސް ތިބާ އޭނާއަށާއި ދަރީންނަށް ހަރަދުކުރާންޖެހޭނެއެވެ. އެ މީހުންނަށް ކެއިންބުއިމާއި އަންނައުނާއި ބޯހިޔާވަހިކަން ތަނަވަސްކޮށްދޭން ޖެހޭނެއެވެ. މިއީ ފިރިމީހާގެ މައްޗަށް ވާޖިބުވެގެންވާކަމެވެ." ހުތުބާގައި ބުންޏެވެ.
އަނބިދަރީންނަށް ރިޒުގު ތަނަވަސްކޮށްދިނުމަށް ޓަކައި މަސައްކަތްކުރުމަކީ ﷲ ގެ މަގުގައި ޖިހާދުކުރުން ފަދަ ސަވާބު މަތިވެރި ކަމެއްކަން ފާހަގަކޮށް ހުތުބާގައި ބުނެފައި ވަނީ އަނބިދަރީންނަށް ހަރަދު ކުރުމަކީ ތިބާއަށް އެކަމުން ދަރުމަ ލިބޭނެ ކަމެއް ކަމަށެވެ.
ނަމަވެސް މިހާރަކަށް އައިސް ބައެއް ފިރީން އަނބިދަރީންނަށް ހަރަދުނުކޮށް އެ ކަމަށް އިހުމާލުވަމުންދާ ކަމަށާއި ދެމަފިރީން ވަރިވުމަށް ފަހު ދަރީންނަށް ހަރަދުނުދީ ފިލައިގެން އުޅޭ މީހުންވެސް މަދެއްނޫން ކަމަށް ހުތުބާގައި ވަނީ ފާހަގަ ކޮށްފައެވެ. މި ކަންކަމާ ބެހޭ ގޮތުން ގިޔާމަތްދުވަހުން ސުވާލުކުރެވޭނެ ކަމަށާއި މި ފަދައިން އުޅޭ މީހުން ވަގުތު ފާއިތުވުމުގެކުރީން ތައުބާވެ، ﷲ ގެ ރުހިވޮޑިގަތުން ހޯދުމަށް މަސައްކަތްކުރުމަށް ވަނީ ހުތުބާގައި ނަސޭހަތްތެރިވެފައެވެ.
