އެމްއެމްއޭއިން އެކުލަވައިލި އާ ގަވާއިދުގެ ދަށުން ވީހައިވެސް އަވަހަކަށް ރެޖިސްޓަރީވުމަށް ފަތުރުވެރިކަމުގެ ދާއިރާގައި ހަރަކާތްތެރިވާ ހުރިހާ ވިޔަފާރިތަކަށް އެ އޮތޯރިޓީން އިލްތިމާސްކޮށްފި އެވެ.
އެމްއެމްއޭއިން ނެރުނު ނޫސްބަޔާނެއްގައި ބުނީ، ފަތުރުވެރިކަމުގެ ދާއިރާގައި ހަރަކާތްތެރިވާ ވިޔަފާރިތަކުގެ ތެރެއިން ޓީޖީއެސްޓީ ދައްކާ ފަރާތްތަކުން، ބޭރުފައިސާއާ ބެހޭ ގަވާއިދުގެ ދަށުން ވީހާވެސް އަވަހަށް އެ އޮތޯރިޓީގައި ރަޖިސްޓްރީވާން އެދޭކަމަށެވެ.
އާ ގަވާއިދުގެ ދަށުން ރެޖިސްޓަރީވާން ބޭނުންވާ ފަރާތްތަކަށް އެމްއެމްއޭގެ ވެބްސައިޓު މެދުވެރިކޮށް ރެޖިސްޓްރީ ވެވޭނެ އެވެ. މި ގަވާއިދުގެ ދަށުން އެމްއެމްއޭގައި ރަޖިސްޓާވާން ޖެހޭ އެންމެ ފަހު ތާރީހަކީ މިމަހުގެ 30 ވަނަ ދުވަހެވެ.
މި ހިނގާ އޮކްޓޯބަރު މަހުގެ 1 ވަނަ ދުވަހު އެމްއޭއިން ވަނީ ފަތުރުވެރިކަމުގެ ވިޔަފާރިކުރާ ފަރާތްތަކުން ރާއްޖޭގެ ބޭންކްތަކަށް ޑޮލަރު މާރުކުރުން ލާޒިމްވާގޮތަށް އާ އުސޫލެއް އެކުލަވާލާފައެވެ. މި އުސޫލުގެ ދަށުން ރާއްޖެ އަންނަ ކޮންމެ ޓޫރިސްޓަކަށް ވަކި ރޭޓެއްގެ ދަށުން ޑޮލަރު މާާރުކުރަން މަޖުބޫރުވެ އެވެ.
އެގޮތުން މި އުސޫލުގެ ދަށުން އޭ ކެޓަގަރީ ހިމެނޭ، ޓޫރިސްޓް ރިޒޯޓުތަކާއި، ހޮޓާތަކާއި، އުޅަނދުތަކާއި އެނޫންވެސް ތަންތަނުން ކޮންމެ ޓޫރިސްޓަކަށް 500 ޑޮލަރުގެ ރޭޓުން މީލާދީ މަހެއްގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ރުފިޔާއަށް މާރުކުރަން ޖެހެއެވެ.
އަދި ބީ ކެޓަގަރީ ހިމެނޭ، މީހުން ދިރިއުޅޭ ރަށްރަށުގައި ހުންނަ ގެސްޓުހައުސްތަކާއި އެ ރަށްރަށުގައި ހުންނަ ހޮޓާތަކުގެ ތެރެއިން 50 ކޮޓަރިއަށް ވުރެ މަދު އަދަދެއްގެ ކޮޓަރި ހުންނަ ތަންތަނުން މާރުކުރަންޖެހޭކަމަށް ކަނޑައަޅާފައިވަނީ ޓޫރިސްޓަކަށް 25 ޑޮލަރެވެ.
