ޖަޕާނު ސަރުކާރުން ދިވެހި ފުލުހުންގެ ހިދުމަތަށް 38.5 މިލިއަން ރުފިޔާގެ ސީސީޓީވީ ކެމެރާ އިކުއިޕްމަންޓް ހަދިޔާކޮށްފިއެވެ.
ޖަޕާނު ސަރުކާރުގެ ފަރާތުން މިތަކެތި ހަވާލުކޮށްދެއްވީ ޖަޕާނުން ދިވެހިރާއްޖެއަށް ކަނޑައަޅާފައި ހުންނަވާ ސަފީރު ތަކެއުޗީ މިދޮރީއެވެ. އަދި ދިވެހި ފުލުހުންގެ ހިދުމަތުގެ ފަރާތުން މި ތަކެއްޗާ ހަވާލުވެވަޑައިގަތީ ކޮމިޝަނާ އޮފް ޕޮލިސް އަލީ ޝުޖާއުއެވެ.
ޖަޕާނު އެމްބަސީއިން ބުނީ މިތަކެތި ހަދިޔާކުރުމުގެ މަގުސަދަކީ މަސްތުވާތަކެތީގެ މައްސަލަތަކާއި، މަސްވެރިކަމުގެ ދާއިރާގައި ހިންގާ ކުށްތަކުގެ އިތުރުން ދިވެހިރާއްޖޭގެ ކަނޑުގެ ސަރަހައްދުތަކަށް އަސަރުކުރާ ކުށްތައް ދެނެގަތުމާއި، ހުއްޓުވުމާއި އަދި ތަހުގީގުކުރުމުގައި އެހީތެރިކަން ފޯރުކޮށްދިނުން ކަމަށެވެ.
ޖަޕާނު ސަރުކާރުން ހަދިޔާކުރި އިކުއިޕްމެންޓްތަކުގެ ތެރޭގައި ސީސީޓީވީ ކެމެރާ، ކޮމްޕިއުޓާ ސިސްޓަމް (މޮނިޓާ، ސީޕީޔޫ، ޔޫޕީއެސް)، ސްމާޓް ޓީވީ އަދި ރަށްރަށުގައި ބަނދަރު ބެލެހެއްޓުމުގެ ނިޒާމު ފުރިހަމައަށް ގާއިމުކުރުމަށް ބޭނުންވާ އެހެނިހެން ތަކެތި ހިމެނެއެވެ.
އެގޮތުން ހަދިޔާކުރެވުނު ސީސީޓީވީ ކެމެރާތައް ހަރުކުރުމަށް ހަމަޖެހިފައި ވަނީ އަތޮޅުތެރޭގެ މީހުން ދިރިއުޅޭ ރަށްރަށުގެ ބަނދަރުތަކާއި ފާލަންތަކުގައި ކަމަށް ޖަޕާނު އެމްބަސީއިން ވަނީ ބުނެފައެވެ. މިތަކެތި ބެހެއްޓުމަށް ހަމަޖެހިފައިވާ ރަށްތަކުގެ ތެރޭގައި އއ. ރަސްދޫ، ހއ. އުލިގަމު، ވ. ފެލިދޫ، ނ. ފޮއްދޫ، ގއ. ވިލިނގިލި، ގދ. ފުވައްމުލައް އަދި ލ. ފޮނަދޫ ހިމެނެއެވެ.
ޖަޕާން އެމްބަސީއިން އިތުރަށް ބުނީ އުންމީދުކުރަނީ މި އިކުއިޕްމަންޓްތަކުގެ ސަބަބުން ފުލުހުންގެ ގާބިލުކަން އިތުރުވެގެންދާނެ ކަމަށެވެ. އަދި ކަނޑުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ފަސޭހަވެގެންދާނެ ކަމަށް އުންމީދު ކުރާ ކަމަށް އެ އެމްބަސީއިން ވަނީ ބުނެފައެވެ.
