އެއް ޖިންސުން ގުޅުން ހިންގުމާއި ޒިނޭކުރުން އާންމުވެއްޖެ ތަނެއް މާތްﷲ ހަލާކުކުރައްވާނެ ކަމަށް މިއަދުގެ ހުކުރު ހުތުބާގައި ބުނެފިއެވެ.
މިއަދުގެ ހުތުބާ ހާއްސަކޮށްފައި ވަނީ ޒިނޭކުރުމާއި ފާހިޝްއަމަލުތަކުގެ ނުބައިކަމަށް ކަމަށް ވާއިރު، ހުތުބާގައި ބުނީ މުސްލިމުންގެ މައްޗަށް ހުރިހައި ބާވަތެއްގެ ބަދުއަހްލާގީ އަމަލުތަކާއި ފާހިޝް އަމަލުތައް މާތް ﷲ ހަރާމްކުރައްވާފައިވާ ކަމަށެވެ. އަދި އެންމެ ނުރައްކާތެރި ފާހިޝް އަމަލަކީ ޒިނޭ ކަމަށެވެ.
ޒިނޭއަކީ އެ ކަމުގައި ހަލާކާއި ބަލިމަޑުކަން ހިމެނޭ ހަޑިމުޑުދާރު އަމަލެއް ކަމަށާއި އެއް ޖިންސުން ގުޅުން ހިންގުމާއި ޒިނޭކުރުން އާންމުވެއްޖެ ތަނެއް މާތް ﷲ ހަލާކުކުރައްވާނެ ކަމަށް ހުތުބާގައި ވަނީ ބުނެފައެވެ. އަދި މި ޒަމާނުގައި މި އަމަލުތަކަށް އަރައިގަންނަނީ އެއްވެސް ޖެހިލުމެއް ނެތި ކަމަށާއި ބައެއް މީހުން ޒިނޭއަށް އަރައިގަތުމުގެ މަގުސަދުގައި ދަތުރު ހަދައިގެން އެހެން ގައުމުތަކަށް ގޮސް އުޅޭކަން ހުތުބާގައި ވަނީ ފާހަގަކޮށްފައެވެ.
ހުތުބާގައި ބުނީ ޒިނޭގެ ސަބަބުން ނުރައްކާތެރި ބަލިތައް ފެތުރުމުގެ އިތުރަށް މުޖުތަމައުގެ އިޖުތިމާއީ ފޭރާން ހަލާކުވެދާ ކަމަށެވެ. އަދި އާއިލާތައް ރޫޅި، ނަސްލު އޮޅި، ރަށްމެދަށް ވިހާ ކުދިން ގިނަވުމުގެ އިތުރުން ހައްޔަރުން ނައްޓުވައިލައިގެން ދަރި ވައްޓައިލުން ފަދަ ދީނުގައި ހަރާމް އެތައް ފާފަތަކަކަށް އަރައިގަންނަ ކަމަށް ވެސް ހުތުބާގައި ވަނީ ބުނެފައެވެ.
އިސްލާހުނުވެ، ފާފަތަކަށް އަރައިގަތުމުގައި ދެމިހުރެއްޖެނަމަ ގަދަފަދަ އަޒާބު ހުރިކަން ހުތުބާގައި ފާހަގަކޮށްފައިވެއެވެ. އެގޮތުން ލިވާތުކުރުމާއި މުންކަރާތްތަކަށް އަރައިގަތުމުގެ ސަބަބުން ލޫތުގެފާނުގެ ގައުމުގެ މީހުންނަށް ދެއްވި އަޒާބުގެ މައްޗަށް ހުތުބާގައި ވަނީ އަލިއަޅުވާލާފައެވެ.
ފާހިޝް އަމަލުތަކުގެ ސަބަބުން ފެތުރެމުންދާ ބަލިތައް ވަރަށް ގިނަކަން ފާހަގަކޮށް ހުތުބާގައި ބުނީ އެއީ ނުރައްކާތެރި ބަލިތަކެއް ކަމަށެވެ. އަދި ޒިނޭއާއި ފާހިޝު އަމަލުތަކުގެ ސަބަބުން ފެތުރެމުންދާ ކިހުނުބަލީގެ ތަފާތު ބާވަތްތަކާއި ހާޕިސް ބައްޔާއި އެއިޑްސް ބައްޔާއި މަކުނުވިދުރިއަކީ މާތް ﷲ ދެއްވި ދުންޔަވީ ސަޒާކަމަށް ހުތުބާގައި ވަނީ ބުނެފައެވެ.
ޒިނޭކުރާ ވަގުތަކީ މުސްލިމު އިންސާނާގެ ހިތުން އީމާންކަން ނިގުޅައިގަނެވޭ ވަގުތެއް ކަމަށާއި ޒިނޭކުރުމަށް ހުށަހެޅޭ ވަގުތު އެ ކަމުން ދުރުވެގެންފި މީހާއަށް ގިޔާމަތް ދުވަހު އަރުޝީގެ ހިޔާވަހިކަން ދެއްވާނެ ކަމަށް ހުތުބާގައި ބުނެފައިވެއެވެ.
ޒިނޭއާއި ފާހިޝު އަމަލުތަކުން ދުރުވެގަތުމަށްޓަކައި ނަމާދު ގާއިމުކުރުމަށާއި ކުޅަދާނަކަން ލިބިގެންވާ މީހާ ކާވެނިކުރުމަށް ވަނީ ހުތުބާގައި ގޮވާލާފައެވެ. އަދި ކާވެނިކުރުމަށް ކުޅަދާނަކަން ލިބިގެންނުވާ މީހާ ސުންނަތް ރޯދަ ހިފުމަށް އިރުޝާދު ދީފައި ވާއިރު، ފާހިޝު އަމަލަކަށް އަރައިގަނެވިފައިވާ މީހާ ވަގުތު ފާއިތު ވުމުގެ ކުރީން ތައުބާވާވުމަށް ވެސް ހުތުބާގައި ގޮވާލާފައިވެއެވެ.
