މާދަމާ ހެނދުނުގެ ވަގުތުގައި ވަގުތު ކޮޅަކަށް މާލެއާއި ހުޅުމާލެއިން ކަރަންޓު ކެނޑިދާނެ ކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ބުނެފިއެވެ.
ސްޓެލްކޯ އިން ބުނީ، މާދަމާ ހެނދުނުގެ 6:00 އިން 7:00 އާ ދެމެދު ހުޅުމާލެ އާއި މާލޭގެ ބައެއް ސަރަހައްދުތަކުން ކަރަންޓުގެ ހިދުމަތް ކެނޑުމަކީ އެކަށީގެންވާ ކަމެއް ކަމަށެވެ.
ކަރަންޓު ކެނޑެން މެދުވެރިވާ ސަބަބު ހާމަ ކުރަމުން އެ ކުންފުނިން ބުނީ، އެއީ ގްރޭޓާ މާލެ އިންޓާކަނެކްޝަން ގްރިޑް ނެޓްވޯކްގައި ކޮންމެހެން ކުރަން ޖެހޭ މުހިއްމު މަސައްކަތްތަކެއް ކުރުމަށް ކަމަށެވެ. އަދި މި ކަމުން ކަސްޓަމަރުންނަށް ދިމާވާނެ ދަތިތަކަށް މައާފަށް އެދޭ ކަމަށް ވެސް އެ ކުންފުނިން ބުނެފައި ވެއެވެ.
ސްޓެލްކޯއިން ކަރަންޓުގެ ހިދުމަތް ދެމުން އަންނަ މާލެ އާއި ހުޅުމާލެ އާއި ވިލިމާލޭގެ ކަރަންޓު އެއް ވިއުގައަކުން ގުޅާލުމަށްޓަކައި ގާއިމް ކޮށްފައިވާ ގްރޭޓާ މާލެ އިންޓާކަނެކްޝަން ގްރިޑުގެ ތެރެއަށް ހުޅުލެ ގްރިޑް ވެސް ވަނީ 2022 ވަނަ އަހަރުތެރޭ އިތުރު ކޮށްފައެވެ. ގްރޭޓާ މާލެ އިންޓަކަނެކްޝަން ގްރިޑަކީ ކަރަންޓުގެ ސިނާއަތުގައި މިހާތަނަށް ރާއްޖޭގައި ހިންގާފައިވާ އެންމެ ބޮޑު އެއް މަޝްރޫއެވެ.
