ނުރައްކާތެރިކޮށް ލޯންޗު ދުއްވި ތިން ކެޕްޓަނުންގެ ލައިސަންސް ހިިފަހައްޓައިފިއެވެ.
ނުރައްކާތެރިކޮށް ލޯންޗުތަކެއް ވާދައަށް ދުއްވާފައި ރަށެއްގެ ފަޅުތެރެއަށް ވަންނަ މަންޒަރު ދައްކުވައިދޭ ވީޑިއޯއެއް މީސްމީޑިއާގައި ދައުރުވާން ފެށީ މިދިޔަ ހޮނިހިރު ދުވަހުގައެވެ.
ފުލުހުން މިއަދު މީޑިއާއަށް ފޮނުވި މެސެޖެއްގައި ބުނީ، ނުރައްކާތެރިކޮށް ލޯންޗު ދުއްވި މައްސަލައާ ގުޅިގެން، ލޯންޗު ދުއްވި ތިން މީހުންގެ ލައިސަންސް ވަގުތީގޮތުން ހިފަހައްޓާފައިވާ ކަމަށާއި، އެ މައްސަލައާ ގުޅުންހުރި ލިޔުންތައް ޓްރާންސްޕޯޓް މިނިސްޓްރީ އަށް ފޮނުވުމަށް މަސައްކަތްކުރަމުންދާ ކަމަށެވެ.
ފުލުހުން ބުނީ އެ މައްސަލައިގައި އަޅާނެ ފިޔަވަޅެއް ނިންމާނީ ޓްރާންސްޕޯޓު މިނިސްޓްރީން ކަމަށެވެ.
ނުރައްކާތެރިކޮށް ލޯންޗު ދުއްވާ މައްސަލައިގައި އާންމުން ވެސް ކަންބޮޑުވުން ފާޅުކޮށްފައިވެއެވެ. އެގޮތުން އެފަދަ ފަރާތްތަކުގެ ލައިސަންސް ހިފެހެއްޓުމަށާއި، އެ މީހުންނާ މެދު ހަރުކަށި ފިޔަވަޅު އެޅުމަށް ގޮވާލާފައިވެއެވެ.
ހޮނިހިރު ދުވަހު އާންމުކުރި ވީޑިއޯގައި ފެންނަނީ އއ. އަތޮލަށް ދަތުރުކުރި ބާރު ސްޕީޑުގެ ދެ ލޯންޗެއް ވާދައަށް ދުއްވާފައި ގޮސް ރަށެއްގެ ފަޅުތެރެއަށް ވަންނަ މަންޒަރެވެ.
