މިދިޔަ މަހު އޮލިމްޕަހުގައި އެޅުވި ކާމިޔާބު ބިރުވެރި ފިލްމު "ސާޔާ" އައްޑޫ މަރަދޫގައި އަޅުވަން ނިންމައިފިއެވެ.
ފިލްމުގެ ދެ ޝޯއެއް މަރަދޫގައި އަޅުވަން ނިންމާފައިވާއިރު ދެ ޝޯ އަޅުވާނީ އަންނަ މަހުގެ 10 އަދި 11 ވަނަ ދުވަހުގެ ރޭގަނޑެވެ. އޮގަސްޓް ހަތެއްގައި އޮލިމްޕަހުގައި ޕްރިމިއާކުރި މި ފިލްމަކީ ޔޫސުފް ޝަފީއު (ޔޫއްޕެ) ލިޔެ، ޑައިރެކްޓްކޮށް އެކްޓްކުރި ފިލްމެއްވެސް މެއެވެ. ފިލްމުގެ ބަތަލާއަކީ މިހާރު ފިލްމު އިންޑަސްޓްރީގެ އެންމެ ނަން މަޝްހޫރު ތަރި އާމިނަތު ރަޝްފާ (އާޝާ) އެވެ. ފިލްމުގައި ކުޅަދާނަ އެކްޓަރު އިބްރާހީމް ޖިހާދު (ޖިމީ) ވެސް ހަރަކާތްތެރިވިއެވެ.
ސާޔާއަކީ ޔޫއްޕެގެ އުފެއްދި ފުރަތަމަ ބިރުވެރި ފިލްމެއް ނޫނެވެ. ޔޫއްޕެ ވަނީ މީގެ ކުރިން ގިނަ ބިރުވެރި ފިލްމުތަކެއް އުފައްދާފައެވެ. އޭގެ ތެރޭގައި "ކަޅަކި"، "އެ ދަތުރު" އަދި "ދައުވަތު" ހިމެނެއެވެ. ޝައި ޕްރޮޑަކްޝަންސްގެ އިސްމާއިލް ޝަފީގު ޕްރޮޑިއުސްކޮށްފައިވާ މި ފިލްމުގެ މައިގަނޑު ވާހަކައަކީ އަލަތު ކައިވެންޏެއްކޮށްގެން އުޅޭ ދެމަފިރިން ފަޅު ރަށަކަށް ގޮސް ދިމާވާ ކަންތައްތަކެވެ. ހިނގާ ބިރުވެރި ހާދިސާތަކެވެ. ދިވެހި ފިލްމު "ސާޔާ" ގެ 18 ޝޯއެއް ކާމިޔާބުކަމާއެކީ ވަނީ އޮލިމްޕަހުގައި ދައްކާފައެވެ.
