މޯލްޑިވްސް އެގްރި ބިޒްނަސް ޕްރޮގްރާމްގެ ދަށުން އުތުރުގެ 5 ރަށެއްގައި ގްރީންހައުސް ގާއިމް ކުރުމުގެ އެއްބަސްވުމުގައި ސޮއިކޮށްފިއެވެ.
އިންޓަރނޭޝަނަލް ފަންޑް ފޯ އެގްރިކަލްޗާ ޑިވެލޮޕްމަންޓް (އިފާޑް) އާއި ދިވެހި ސަރުކާރާއި ގުޅިގެން ކުރިއަށްގެންދާ މި ޕްރޮގްރާމް އުތުރުގެ ތިން އަތޮޅެއްގެ 26 ރަށެއްގައި ކުރިއަށް ގެންދިއުމަށް ވަނީ ހަމަޖެހިފައެވެ. އެގޮތުން މިހާރު ހއ، ހދ އަދި ށ އަތޮޅުގެ 12 ރަށެއްގައި ގްރީންހައުސްތައް އަޅައި ދަނޑުވެރިކަމުގެ މަސައްކަތްވަނީ ފަށާފައެވެ.
މީގެ އިތުރުން އުތުރުގެ 5 ރަށެއްގައި ގްރީންހައުސް އެޅުމުގެ އެއްބަސްވުމުގައި އިއްޔެ މިނިސްޓްރީ އޮފް އެގްރިކަލްޗާ އެންޑް އެނިމަލް ވެލްފެއާ އާއި ވިސީ ގްރޫޕް ޕްރައިވެޓް ލިމިޓެޑާއެކު ވަނީ ސޮއިކޮށްފައެވެ. މި އެއްބަސްވުމުގައި އެގްރިކަލްޗާ މިނިސްޓްރީގެ ފަރާތުން ސޮއިކުރެއްވީ ފައިނޭންސް އެގްޒެކެޓިވް ފާތިމަތު ޝާއިއާއެވެ. އަދި ވިސީ ގްރޫޕް ޕްރައިވެޓް ލިމިޑެޓްގެ ފަރާތުން ސޮއިކުރެއްވީ މެނޭޖިން ޑިރެކްޓަރު އިސްމާއިލް ރަޝީދުއެވެ.
މި ޕްރޮގްރާމްގެ ތެރެއިން މިފަހަރު ގްރީންހައުސް އެޅުމަށް ސޮއިކުރެވުނު ރަށްތަކަކީ ހދ.ކުމުންދޫ، ހދ.ހަނިމާދޫ، ށ.ބިލެއްފަހި، ށ.ކަނޑިތީމު އަދި ށ.ފޭދޫއެވެ. މި އެއްބަސްވުމުގެ ދަށުން މި 5 ރަށުގައި ގްރީންހައުސް އަޅައިގެން މެލަން އަދި ކިއުކަންބާ ހައްދާނެގޮތުގެ ތަމްރީން ދިނުމަށް ވަނީ ހަމަޖެހިފައެވެ.
މި ރަސްމިއްޔާތުގައި އެގްރިކަލްޗާ މިނިސްޓަރު ޑރ. އައިޝަތު ރަމީލާ ވިދާޅުވީ، މި ޕްރޮގްރާމުގެ ދަށުން ޒަމާނީ ގޮތަށް ދަނޑުވެރިކަން ކުރުމާއި އަދި ދަނޑުވެރިކަން ކުރުމުގެ ތެރެއަށް ޒުވާނުން ވަންނާނެގޮތަށް ރާވައިގެން ދަނޑުވެރިކަން ކުރިއަށް ގެންދިއުމަށް ހާއްސަ އިސްކަމެއް ދޭނެ ކަމަށެވެ.
