މީހެއްގެ ޖީބުން މަގުމައްޗަށް ވެއްޓިގެން ގެއްލުނު 17000 ރުފިޔާ ފުލުހުން ހޯދައިފިއެވެ.
މި މައްސަލަ ފުލުހުންނަށް ރިޕޯޓްކޮށްފައި ވަނީ މި މަހުގެ 9 ވަނަ ދުވަހުއެވެ.
ފުލުހުން ބުނީ، މި ރިޕޯޓް ކުރުމާ އެކު އެ ފައިސާ ހޯދުމަށް ސީސީޓީވީ ފުޓޭޖް ބަލައި އެ ފައިސާތައް މަގުމަތިން ނެގި މީހާ ދެނެގަނެފައިވާ ކަމަށެވެ. އަދި ގަލޮޅު ޕޮލިސްގެ ފުލުހުން ކުރި މަސައްކަތުން މިރޭގެ ވަގުތެއްގައި އެ ފައިސާ ވަނީ ހޯދާފައި ކަމަށް ވެސް ފުލުހުން ބުނެއެވެ.
މި މައްސަލައާ ގުޅިގެން އަދި މީހަކު ހައްޔަރުކޮށްފައި ނުވާ ކަމަށް ވެސް ފުލުހުން ބުނެއެވެ. މި މައްސަލަ ފުލުހުން ދަނީ ތަހުގީގު ކުރަމުންނެވެ.
މީގެ ކުރިން ވެސް ވޮލެޓެއް ގެއްލުނު މީހެއްގެ ވޮލެޓުގައި ހުރި ނަގުދުފައިސާ ހޯދަން ފުލުހުންނަށް ރިޕޯޓްކޮށްފައިވާ މައްސަލައެއްގައި އެ ފައިސާ ވަނީ އަނބުރާ އެ ފަރާތަށް ހޯދައި ދީފައެވެ. އެ މައްސަލައިގައި ޓެކްސީ ޑްރައިވަރެއް ވަނީ ފުލުހަށް އެ ވޮލެޓް ގެންގޮސް ހަވާލުކޮށްފައެވެ.
