މާލޭގައި އަންހެނަކު ރަހީނު ކުރި މައްސަލައިގައި ހައްޔަރުކޮށް، ބަންދުގައި ހުއްޓާ މަރުވި އާދަމް އަތުހަރުގެ ހަށިގަނޑު ޕޯޓްމޯޓަމް ހެދުމަށްފަހު، ރާއްޖެ ގެނެސް މިރޭ ވަޅުލަން ނިންމައިފިއެވެ.
އަންހެނަކު ރަހީނު ކުރި މައްސަލާގައި، ހައްޔަރުކޮށް ދޫނިދޫ ޖަލުގައި ހުއްޓާ އަތުހަރު ވަނީ ދަންޖެހި އަމިއްލައަށް މަރުވާން މަސައްކަތް ކޮށްފައެވެ. އަދި އޭނާ މަރުވެފައި ވަނީ އައިޖީއެމްއެޗްގެ އައިސީޔޫގައި ފަރުވާދެމުން ދަނިކޮށް މި މަހުގެ 2 ވަނަ ދުވަހުއެވެ.
އަތުހަރު މަރުވި ގޮތް ދެނެގަތުމަށް ޕޯސްޓްމޯޓަމް ހެދުމަށް އޭނާގެ ހަށިގަނޑު ރާއްޖެއިން ބޭރަށް ފޮނުވާ މިދިޔަ ހުކުރު ދުވަހު ވަނީ ޕޯސްޓްމޯޓަމް ހަދާފައެވެ.
އަތުހަރުގެ މައްޗަށް ކަށުނަމާދު ކުރުމަށް ހަމަޖެހިފައި ވަނީ މިރޭ 10:00ގައި ހުޅުމާލެ ސަހަރާ މިސްކިތުގައެވެ.
އަތުހަރު ދޫނިދޫ ޖަލުގައި ބަންދުކޮށްފައި ހުއްޓާ އަމިއްލައަށް ދަންޖެހިގެން މަރުވި މަންޒަރު ފެންނަ ސީސީޓީވީ ވީޑިއޯ ފުޓޭޖް ފުލުހުން ވަނީ ނޫސްވެރިންނަށް ދައްކާލާފައެވެ. އެ ސީސީޓީވީ ފުޓޭޖުން ފެންނަ ގޮތުގައި އަތުހަރު ދަންޖެހެން މަސައްކަތްކޮށްފައި ވަނީ އޭނާގެ ސޯޓުގެ ނާޑުވާއެއް އޭނާ ބަންދުކޮށްފައި ހުރި ގޮޅީގެ ކުޑަދޮރުގައި އައްސައިގެންނެވެ.
ޖަލުގައި ދަންޖެހެން މަސައްކަތް ކުރި އަތުހަރު އައިޖީއެމްއެޗަށް ގެންގޮސް ފަރުވާ ދީފައި ވަނީ ފުލުހުންގެ ބެލުމުގެ ދަށުންނެވެ. ދަންޖެހިފައި ހުއްޓާ ފެނިފައި ވަނީ ޖަލު ކެމެރާ މޮނިޓާ ކުރަމުން ދިޔަ ވަގުތު ޖަލުގެ ކެމެރާއިން ކަމަށް ފުލުހުން ބުނެފައި ވެއެވެ. އަދި އައިޖީއެމްއެޗްގެ އައިސީޔޫގައި ފަރުވާ ދެމުން ދަނިކޮށް އޭނާ މަރުވެފައި ވަނީ މިދިޔަ ހޯމަ ދުވަހުގެ ހަވީރު 4:08 ހާއިރުއެވެ.
