ފުލުހުންގެ ބެލުމުގައި ދަށުގައި ހުއްޓައި އަމިއްލައަށް މަރުވާން މަސައްކަތް ކޮށް ހާލު ދެރަވެގެން ހޮސްޕިޓަލުގައި ފަރުވާ ދެމުން ދަނިކޮށް މަރުވި އާދަމް އަތުހަރު، 32އ, މަރުވި ސަބަބު ދެނެގަތުމަށް ޕޯސްޓްމޯޓަމް ހަދެމުށް ރާއްޖެއިން ބޭރަށް ފޮނުވާލައިފިއެވެ.
އޭނާގެ ހަށިގަނޑު ޕޯސްޓްމޯޓަމް ހެދުމަށް ރާއްޖެއިން ބޭރަށް ފޮނުވާލީ މިއަދު ހެނދުނުގެ ވަގުތެއްގައެވެ. ފުލުހުން ބުނީ މާދަމާ އަތުހަރުގެ ޕޯސްޓްމޯޓަމް ހެދުމަށް ހަމަޖެހިފައިވާ ކަމަށެވެ.
ފުލުހުން އަތުހަރު ހައްޔަރު ކުރީ މިދިޔަ އޮގަސްޓް މަހުގެ 29 ވަނަ ދުވަހުގެ ރޭ މާލޭގައި އަންހެނަކު ރަހީނު ކޮށްގެން ފިލަން މަސައްކަތް ކުރަނިކޮށެވެ. މި މައްސަލައިގެ ޝަރީއަތް ނިމެންދެން ފުލުހުންގެ ބެލުމުގެ ދަށުގައި ދޫނިދޫގައި ހުއްޓާ އަތުހަރު މަރުވާން މަސައްކަތް ކުރީ ދަންޖެހިގެންނެވެ. އެއީ މި މަހުގެ 02 ވަނަ ދުވަހުއެވެ.
ފުލުހުން ބުނީ މި މައްސަލައާ ގުޅިގެން މިނިވަން މުއައްސަސާތަކުން ކުރަމުންދާ ތަހުގީގު ތަކަށް ދިވެހި ފުލުހުންގެ ހިދުމަތުން ފުރިހަމަ އެއްބާރުލުން ދޭނެކަމަށެވެ. އިތުރަށް ފުލުހުން ބުނީ އަތުހަރުގެ އޮޓޮޕްސީއެއް ހެދުމަށް ނިންމާފައި ވަނީ އޭނާ މަރުވުމުގައި އިތުރު ސަބަބެއް ނެތްކަން ޔަގީން ކުރުމުގެ ބޭނުމުގައި ކަމަށެވެ.
