ބާރު ސްޕީޑްގައި ދިޔަ ރޭސް ކާރެއް ކޮންޓްރޯލް ނުވެ ސައިކަލެއްގައި ޖެހި، ހުޅުމާލޭ ފޭސް 2 ގެ ވިނަރެސް ފްލެޓް ކައިރީގައި ހިނގި އެކްސިޑެންޓުގައި ކާރު ދުއްވަން އިން އިބްރާހިމް އިކްރާމްގެ ބަންދަށް ކޯޓުން 3 ދުވަސް ޖަހައިފިއެވެ.
ޖުލައި 31 ވަނަ ދުވަހު ހިނގި މި އެކްސިޑެންޓާ ގުޅިގެން އިކްރާމް ހައްޔަރުކޮށްފައި ބެހެއްޓުމަށްފަހު، ސެޕްޓެމްބަރު 1 ވަނަ ދުވަހު އޭނާ ދޫކޮށްލާފައި ވަނީ ވަކީލަކު ނެތި ކްރިމިނަލް ކޯޓުން ބަންދުގެ މުއްދަތު ޖެހުމުން އެއީ ގޯހެއް ކަމަށް ހައި ކޯޓުން ކަނޑައެޅުމާ ގުޅިގެންނެވެ. ނަމަވެސް އިކްރާމް ވަނީ ކޯޓު އަމުރެއްގެ ދަށުން އަލުން ހައްޔަރު ކޮށްފައެވެ.
ވިނަރެސް ފްލެޓްތަކުގެ މެދަށް އޮންނަ މަގުން ބާރު ސްޕީޑުގައި ދުއްވި ކާރެއް ކޮންޓްރޯލުން ނެއްޓި، އެ މަގުގެ އެއް ފަރާތުގައި ސައިކަލެއްގައި މަޑުކޮށްގެން އިން މީހެއްގެ ގައިގައި ޖެހިގެން ހިނގި މި އެކްސިޑެންޓާ ގުޅިގެން އިކްރާމްގެ އިތުރުން 2 މީހަކު ހައްޔަރުކޮށްފައި ވެއެވެ. އެއީ އިކްރާމުއްރަހްމާން ހ. ނޫރަންމާގެއާގެ އަދި ޖިނާހް އިސްމާއީލް ގއ. ކަނޑުހުޅުދޫ، އާޒާދުގެ އެވެ. މި ތިން މީހުންނަކީވެސް ކުށުގެ ރިކޯޑު އޮތް ތިން މީހުންނެވެ.
ކާރު ކޮންޓްރޯލުން ނައްޓައިގެން ގޮސް ޕާކްކޮށްފައި ހުރި ސައިކަލެއްގެ މަތީގައި އިން މީހާއާ އެކު ސައިކަލުގައި ޖެހުނުލެއް ބާރުކަމުން އެ މީހާ އެ ވަގުތު ވިއްސައިގެންދާ މަންޒަރު އާންމުވި، ސީސީޓީވީ ފުޓޭޖްތަކުން ވަނީ ފެނިފައެވެ. މި އެކްސިޑެންޓުގައި ހިމެނޭ ސައިކަލުގައި އިން ފިރިހެން މީހާއަށް ވަނީ ބޮޑެތި އަނިޔާތަކެއް ލިބިފައެވެ.
އެގޮތުން އެމީހާގެ ކަނދުރާ އަދި ބެކްބޯންގައި ވެސް ރެނދުލާފައިވާ ކަމަށް ފުލުހުން ވަނީ ބުނެފައެވެ. މީގެއިތުރުން އެ މީހާގެ ބޯ ވެސް ވަނީ ފަޅައިގެން ގޮސްފައެވެ.
