ފުލުހުންގެ މަސައްކަތްތައް ފަސޭހަކޮށް ހަލުވިކުރުމަށްޓަކައި އާ އެޕްލިކޭޝަންތަކެއް ތައާރަފުކޮށް، ކުރިން ބޭނުންކުރަމުން ދިޔަ ބައެއް އެޕްލިކޭޝަންތައް އަލުން ފަރުމާކޮށް، އިފްތިތާހުކޮށްފިއެވެ.
މި އެޕްލިކޭޝަންތައް އިފްތިތާހުކޮށްފައި ވަނީ ދިވެހި ފުލުހުންގެ ހިދުމަތަށް 20 އަހަރު ފުރުން ފާހަގަކުރުމުގެ ގޮތުން އިއްޔެ އިސްކަންދަރު ބިލްޑިންގައި ބޭއްވި ހާއްސަ ރަސްމިއްޔާތުގައެވެ.
އިތުރު ފީޗާސް ތަކާއެކު އަލުން ފަރުމާކުރި އެޕްލިކޭޝަންތަކުގެ ތެރޭގައި ޑިޖިޓަލް ޑޭޓާ އެންޑް ޓެކްނޮލޮޖީ ސަޕޯޓް ޕޯޓަލް، ޕީއައިއައި ޓީމްސް އެޕްލިކޭޝަން، ޕާސަން އޮފް އިންޓްރެސްޓް ޕޯޓަލް، ނެއިބަހުޑް ސަޕޯޓް ސިސްޓަމް، ޓެކްނިކަލް އޮޕަރޭޝަން ޕްލެޓްފޯމް، އޮޕްސް މޮބައިލް އެޕް އަދި ފޭސް އެޕްތައް ހިމެނެއެވެ.
އަދި މުޅީން އަލަށް ތައާރަފުކުރެވުނު އެޕްލިކޭޝަންތަކުގެ ތެރޭގައި ޕައިން މައިންޑުގެ ދަށުން ޑިވެލޮޕްކޮށްފައިވާ އޮޓޮމެޓިކް ސްޕީޗް ރެކޮގްނިޝަން (އޭއެސްއާރު) އަދި އިންވެސްޓިގޭޝަން މޮޑިއުލްއަށް އިތުރުކުރެވުނު ސުޕަވައިޒާ ޑޭޝްބޯޑް ހިމެނެއެވެ. މި ގެނެވުނު ބަދަލާ އަދި އާ އެޕްލިކޭޝަންތަކުގެ ސަބަބުން ފުލުހުންގެ މަސައްކަތްތައް އިތުރަށް ހަރުދަނާވެ، މައުލޫމާތު ބެލެހެއްޓުމާއި، ތަހުގީގުތައް ކުރިއަށްގެންދިއުމާއި، މުޖުތަމައާ ގުޅިގެން ކުރާ މަސައްކަތްތައް ހަލުވިވެ ފަސޭހަވެގެންދާނެ ކަމަށް އެ އިދާރާއިން ބުނެއެވެ.
މި އާ އެޕްލިކޭޝަންތަކުގެ ތެރެއިން ޑިޖިޓަލް ޑޭޓާ އެންޑް ޓެކްނޮލޮޖީ ސަޕޯޓް ޕޯޓަލްއަކީ ފުލުހުންގެ މުވައްޒަފުންނަށް ޓެކްނިކަލް މައްސަލަތައް ރިޕޯޓުކޮށް، ބަލަހައްޓައި އަދި ހައްލުކުރުމަށް މަގުފަހިކޮށްދޭ ޕްލެޓްފޯމެކެވެ. އަދި ނެއިބަހުޑް ސަޕޯޓް ސިސްޓަމަކީ މުޖުތަމައުގެ ބައިވެރިވުން އިތުރުކޮށް، ގުޅުންހުރި ހަރަކާތްތައް ހަރުދަނާކުރުމަށް ފަރުމާކުރެވިފައިވާ ނިޒާމެކެވެ.
އެގޮތުން އޮޕްސް މޮބައިލް އެޕަކީ އާންމު މަސައްކަތުގައި އުޅޭ ފުލުހުންނަށް ހާއްސަކޮށް ތައްޔާރުކުރެވިފައިވާ އެޕްލިކޭޝަނެކެވެ. މި އެޕްގެ ސަބަބުން، ފީލްޑުގައި މަސައްކަތްކުރާ ފުލުހުންނަށް މުހިންމު މައުލޫމާތާއި ވަސީލަތްތައް ފަސޭހައިން ލިބި، މަސައްކަތުގެ ހަލުވިކަމާއި ފެންވަރު މަތިވެގެންދާނެއެވެ.
މީގެ އިތުރުން، ޕީއައިއައި ޓީމްސް އެޕްލިކޭޝަނަކީ ފުލުހުންގެ މަސައްކަތްތައް ހަރުދަނާކުރުމަށް ހާއްސަކޮށް ފަރުމާކުރެވިފައިވާ އެޕްލިކޭޝަނެކެވެ. މި އެޕްލިކޭޝަންގައި، އަމިއްލަ ޕްރޮފައިލް ބެލެހެއްޓުމާއި ޕޮލިސް ގެޒެޓަށް ވަނުމާއި އެންޑޯޒް ކުރުމާއި އެޕްރޫވްކުރުމުގެ ހިދުމަތް ހިމެނެއެވެ.
ޕާސަން އޮފް އިންޓްރެސްޓް (ޕީއޯއައި) ޕޯޓަލްއަކީ މައްސަލަތަކުގައި ތުހުމަތުކުރެވޭ ފަރާތްތަކުގެ މައުލޫމާތު ބެލެހެއްޓުމަށް ފަރުމާކުރެވިފައިވާ ސިސްޓަމެކެވެ. މި ސިސްޓަމުން މީހުންނާގުޅޭ މައުލޫމާތުތައް އަޕްޑޭޓްކޮށް އަދި ފަސޭހައިން ލިބޭނެ ގޮތް ހަދައިދެއެވެ.
ޓެކްޓިކަލް އޮޕަރޭޝަން ޕްލެޓްފޯމް (ޓީއޯޕީ) އަކީ ދިވެހި ފުލުހުންގެ ޚިދުމަތުގެ އޮޕަރޭޝަނަލް ބޭނުންތަކަށް ހާއްސަކޮށް ތައްޔާރުކުރެވިފައިވާ ހައްލެކެވެ. މި ޕްލެޓްފޯމުގެ މަގުސަދަކީ ހާލަތު ދެނެގަތުމާއި، ވަގުތުން ވަގުތަށް ނިންމުންތައް ނިންމުމުގެ ގާބިލުކަން އިތުރުކުރުމެވެ.
މި އާ އަދި އަޕްޑޭޓްކުރެވުނު އެޕްލިކޭޝަންތަކުގެ ސަބަބުން ފުލުހުންގެ މަސައްކަތްތައް އިތުރަށް ހަރުދަނާވެ، މައުލޫމާތު ބަދަލުކުރުމާއި ކޭސްތައް ބެލެހެއްޓުން ފަދަ ކަންކަން ފަސޭހަވެގެންދާނެ ކަމަށް ފުލުހުން ބުނެއެވެ. މީގެ އިތުރުން، މި ޓެކްނޮލޮޖީގެ ބޭނުން ހިފުމުގެ ސަބަބުން ފުލުހުންގެ މަސައްކަތުގެ ފެންވަރު މަތިވެ، ރައްޔިތުންނަށް ދެވޭ ހިދުމަތް އިތުރަށް ހަރުދަނާވެގެންދާނެ ކަމަށް ވެއެވެ.
މި ހާއްސަ ރަސްމިއްޔާތު ޝަރަފުވެރިކޮށްދެއްވީ ކޮމިޝަނާ އޮފް ޕޮލިސް އަލީ ޝުޖާއުއެވެ. މި ރަސްމިއްޔާތުގައި ޑެޕިއުޓީ ކޮމިޝަނާ އޮފް ޕޮލިސް ފަރުހާދު ފިކުރީ، ޑެޕިއުޓީ ކޮމިޝަނާ އޮފް ޕޮލިސް އިސްމާއީލް ނަވީން އަދި ފުލުހުންގެ އެގްޒެކެޓިވް ބައެއް އޮފިސަރުންނާއި ޑިޖިޓަލް ޑާޓާ އެންޑް ޓެކްނޮލޮޖީ ކޮމާންޑުގެ އިސްވެރިންނާއި މުވައްޒަފުން ވަނީ ބައިވެރިވެޑައިގެންފައެވެ.
