ބޯޓަކުން 50،000 ރުފިޔާގެ އަގުހުރި ރިހާކުރު ޓައްޕުތަކެއް ވިއްކާލި މައްސަލަ ބަލަމުންދާ ކަމަށް ފުލުހުން ބުނެފިއެވެ.
ފުލުހުން ބުނީ، ނޯތު ހާބަރުގައި އޮތް ބޯޓަކުން ރިހާކުރު ޓައްޕުތަކެއް ވަގަށް ނަގާފައިވާ މައްސަލައެއް ފުލުހުންނަށް މިދިޔަ ހުކުރު ދުވަހު ހުށަހަޅާފައިވާ ކަމަށެވެ.
އަދި މިމައްސަލަ އާއި ގުޅިގެން އެތަކެތި ހޯދުމަށް ސީސީޓީވީ ފުޓޭޖް ބަލައި ދެނެގަނެ ފުލުހުން ކުރި މަސައްކަތުން ރިހާކުރު ޓައްޕުތައް ހޯދާފައިވާ ކަމަށް ފުލުހުން ބުންޏެވެ. އެ ތަކެތި ފެނިފައި ވަނީ އެހެން މީހަކަށް އެ ޓައްޕުތައް ވިއްކާލާ ގެއެއްގެ ތެރޭ ފޮރުވާފައި ހުއްޓާ ކަމަށް ފުލުހުން ވަނީ މައުލޫމާތު ދީފައެވެ.
އެއީ ކިތައް ޓައްޕުކަން ފުލުހުން ހާމަކޮށްފައި ނުވާއިރު ވެރިފަރާތާ ހަވާލާދީ ފުލުހުން ބުނީ އެ ޓައްޕުތަކުގެ އަދަދު 50،000 ރުފިޔާއަށް އަރާނެ ކަމަށެވެ. މިމައްސަލަ އާއި ގުޅިގެން އަދި މިހާތަނަށް މީހަކު ހައްޔަރު ކޮށްފައި ނުވާ ކަމަށާއި ނަމަވެސް މައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ވަނީ ބުނެފައެވެ.
ރާއްޖޭގައި މިހާރަކަށް އައިސް ވައްކަމާއި ފޭރުން ވަނީ ނުހުނު އިންތިހާއަށް ގިނަވެފައެވެ. އަދި މިފަދައިން ވަގަށް ނަގާ ތަކެތި ކުޑަ އަގަގެއްގައި ވިއްކައިގެން އޭގެ މަންފާ ހޯދާ މީހުން ދަނީ އިތުރު ވަމުންނެވެ. މިފަދައިން ވައްކަން ކޮށް ގިނައިން އުޅެނީ މީގެ ކުރިންވެސް އެކި އެކި ކުށުގެ ރިކޯޑުތައް އޮންނަ މީހުންކަން ފާހަގަކޮށްލެވެއެވެ.
