މި މަހުގެ ނިޔަލަށް ބިދޭސީންގެ ފީ ނުދައްކާނަމަ ކުންފުނިތައް ސަސްޕެންޑް ކުރާނެ ކަމަށް ހޯމް މިނިސްޓްރީއިން ބުނެފިއެވެ.
ދިވެހިރާއްޖޭގައި ވަޒީފާ އަދާކުރާ ބިދޭސީންނާއި ގުޅިގެން ދޫކުރާ ހުއްދަތަކަށް ދައުލަތަށް ދައްކަންޖެހޭ ފީތަކާއި ޖޫރިމާނަ ނުދައްކާނަމަ އެކްސްޕެޓް ސިސްޓަމުން ދެމުން ގެންދާ ހިދުމަތް މެދުކަނޑާލާނެ ކަމަށް އެ މިނިސްޓްރީއިން ވަނީ ބުނެފައެވެ.
ހޯމް މިނިސްޓްރީއިން ބުނީ ދިވެހިރާއްޖޭގައި ވަޒީފާ އަދާކުރާ ބިދޭސީންނާއި ގުޅިގެން ދޫކުރާ ހުއްދަތަކަށް ދައުލަތަށް ދައްކަންޖެހޭ ފީތަކާއި ޖޫރިމަނާ 100،000 ރުފިޔާއަށްވުރެ އިތުރުވާ ވަޒީފާދޭ ފަރާތްތައް، މި މަހުގެ 12 ވަނަ ދުވަހުގެ ކުރިން ފައިސާ ދައްކާ ހަލާސްކުރުމަށް އަންގާފައިވާ ކަމަށެވެ.
އެ ފައިސާ ދައުލަތަށް ދެއްކުމުގެ އިތުރު ފުރުސަތެއް ގޮތުން ހޯމް މިނިސްޓްރީއިން ވަނީ މި މަހުގެ 31 ވަނަ ދުވަހުގެ ނިޔަލަށް މުއްދަތު އިތުރުކޮށްފައެވެ. އަދި މަސް ނިމުމުގެ ކުރިން ވަޒީފާދޭ ފަރާތުން ފައިސާ ދައްކާފައިނުވާނަމަ، އެ ފައިސާ ދައުލަތަށް ދައްކާ ހަލާސް ކުރުމަށް މިނިސްޓްރީއިން ވަނީ އެދިފައެވެ.
ހޯމް މިނިސްޓްރީއިން ބުނީ މި ތާރީހާ ހަމައަށް ފައިސާ ދައްކާފައިނުވާ ވަޒީފާދޭ ފަރާތްތައް، ސެޕްޓެމްބަރު 1 ވަނަ ދުވަހުން ފެށިގެން ދިވެހިރާއްޖޭގައި ބިދޭސީން ވަޒީފާ އަދާކުރުމާބެހޭ ގަވާއިދުގެ ދަށުން އެކްސްޕެޓް ސިސްޓަމްއިން ސަސްޕެންޑް ކުރެވި ސިސްޓަމް މެދުވެރިކޮށް ދެމުން ގެންދާ ހިދުމަތްތައް މެދުކަނޑާލެވޭނެ ކަމަށެެވެ.
