ފަތުރުވެރިކަން ކުރިއެރުވުމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން މޯލްޑިވިއަންއާއެކު އެމްއޯޔޫއެއްގައި ސޮއިކޮށްފިއެވެ.
މި އެމްއޯޔޫގެ މަގްސަދަކީ ދުނިޔޭގެ އެކި ކަންކޮޅުތަކުން ޒިޔާރަތްކުރާ ފަރާތްތައް ޝައުގުވެރިވާނެ މާކެޓިން ކެމްޕެއިންތަކާއި އިނީޝިއޭޓިވްތައް އުފެއްދުމަށް ދެ ވުޒާރާގެ ގުޅިފައިވާ ބާރުތަކުގެ ބޭނުން ހިފުން ކަމަށް އެމްއެމްޕީއާރްސީ އިން ވަނީ ބުނެފައެވެ. އެގޮތުން މި އެމްއޯޔޫގެ ދަށުން ބްރޭންޑެޑް އިޝްތިހާރުތަކާއި ޕްރޮމޯޝަނަލް ހަރަކާތްތަކާއި ބައިނަލްއަގުވާމީ ކެމްޕެއިންތައް ބޭއްވުމަށް ވަނީ ހަމަޖެހިފައެވެ.
އެމްއެމްޕީއާރުސީގެ ސީއީއޯ އަދި އެމްޑީ އިބްރާހިމް ޝިއުރީ ވިދާޅުވީ ރާއްޖެ އިޝްތިހާރު ކުރުމަށް މޯލްޑިވިއަން އާއެކު ގުޅިގެން މަސައްކަތް ކުރުމަކީ ލިބޭ ވަރަށް ބޮޑު އުފަލެއް ކަމަށާއި، މި ކޯލަބްރޭޝަންގެ ސަބަބުން ފުޅާ ދާއިރާއެއްގައި ފަތުރުވެރިންނާ ހަމައަށް ވާސިލުވެ ރާއްޖޭގެ ރަށްރަށުގެ ރީތިކަމާއި ތަފާތުކަން ދައްކުވައިދިނުމުގައި ފަސޭހަތަކެއް ވެގެންދާނެ ކަމަށެވެ.
މި އެމްއޯޔޫއާއި ގުޅިގެން މޯލްޑިވިއަންގެ މެނޭޖިން ޑިރެކްޓަރު އިބްރާހިމް އިޔާސް ވިދާޅުވީ މި ޕާޓްނާޝިޕަކީ ދުނިޔޭގެ އެންމެ ބޮޑު ޓްރެވަލް ޑެސްޓިނޭޝަނެއްގެ ގޮތުގައި ރާއްޖޭގެ މަގާމު މަތިކުރުމަށް ކުރާ މަސައްކަތަށް ލިބުނު ވަރަށް ބޮޑު ކުރިއެރުމެއްކަމަށާއި، މި އެއްބާރުލުން މެދުވެރިކޮށް ދަތުރުފަތުރުގެ ތަޖުރިބާތައް ގިނަކޮށް، ދެމެހެއްޓެނިވި ފަތުރުވެރިކަން ކުރިއަރުވައި އިގްތިސާދީ ކުރިއެރުމަށް މަގުފަހިވެގެންދާނެކަމަށެވެ.
މި އެމްއޯޔޫގައި ސޮއިކޮށްފައިވަނީ އެމްއެމްޕީއާރުސީގެ މައި އޮފީހުގައި 15 އޮގަސްޓް ގައި ބޭއްވި ރަސްމިއްޔާތެއްގައެވެ. މި އެއްބަސްވުމުގައި އެމްއެމްޕީއާރުސީގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރު އަދި މެނޭޖިން ޑިރެކްޓަރު އިބްރާހިމް ޝިއުރީ އާއި މޯލްޑިވިއަންގެ މެނޭޖިން ޑިރެކްޓަރު އިބްރާހިމް އިޔާސްއެވެ.
