ބިދޭސީންނާ ގުޅޭ ގޮތުން ދައުލަތަށް ދައްކަން ޖެހޭ ހުއްދަ އާއި ކޯޓާ ފީ ނުދައްކާ ތިބި ހާހަކަށް ވުރެ ގިނަ ކުންފުނިތަކުގެ ތެރެއިން މިއަދާ ހަމައަށް 20 ކުންފުންޏަކުން ފައިސާ ދައްކާފައިވާކަން، ހޯމްލޭންޑް މިނިސްޓްރީން މިރޭ ހާމަކޮށްފިއެވެ.
އެ މިނިސްޓްރީން މިކަން ހާމަކުރީ، ހާހަކަށް ވުރެ ގިނަ ކުންފުނި ލިސްޓު ހިމެނޭ ކުންފުނިތައް އާންމުކުރި ތާރީހުން ފެށިގެން އިއްޔެގެ ނިޔަލަށް 182 މިލިއަން ރުފިޔާ ލިބިފައިވާކަން ހާމަކުރުމަށް ފަހުއެވެ.
މިރޭ އެ މިނިސްޓްރީން އާންމުކުރީ، އެކްސްޕެޓް ސިސްޓަމް މެދުވެރިކޮށް ފޯރުކޮށްދޭ ހިދުމަތްތަކުގެ ފީތަކާ ގުޅިގެން ގަވައިދުން ދައުލަތަށް ފީތައް ދައްކަމުންދާ ކުންފުނިތަކުގެ ލިސްޓެކެވެ. 20 ކުންފުންޏެއް ހިމެނޭ އެ ލިސްޓުގައި މާމިގިލި ދާއިރާގެ މެންބަރު ގާސިމް އިބްރާހީމްގެ ވިލާ ކޮންސްޓްރަކްޝަނާއި ވިލާ ހަކަތަ އާއި ހޮރައިޒަން ފިޝަރީޒްގެ އިތުރުން، އޭދަފުށި ދާއިރާގެ މެންބަރު އަހްމަދު ސަލީމްގެ ރެޑްވޭވް ކުންފުނި ހިމެނެއެވެ.
ހޯމްލޭންޑް މިނިސްޓްރީން ބުނީ، މިއަދާ ހަމައަށް ދައްކަން ޖެހޭ ފައިސާ އެ ކުންފުނިތަކުން ދައްކާފައިވާ ކަމަށާއި، އެ ކުންފުނިތަކުގެ ނަންތައް އޭރު ހިމަނާފައިވަނީ ދައުލަތަށް ދައްކަން ޖެހޭ ފީގެ އަދަދު ލައްކައަކަށް ވުރެ އިތުރުވުމުގެ ސަބަބުން ކަމަށެވެ.
މިދިޔަ މަހުގެ 24 ވަނަ ދުވަހު އެ މިނިސްޓްރީން އާންމުކުރި ލިސްޓުގައިވާ ކުންފުނިތަކުން ދައުލަތަށް 636.5 މިލިއަން ރުފިޔާ ދައްކަން ޖެހެއެވެ. އެކަން ހާމަކޮށް ކުރި އިއުލާނުގައި މިނިސްޓްރީން އެ ދުވަހުގެރޭ ވަނީ، މިދިޔަ ހޯމަ ދުވަހުގެ ކުރިން އެ ހުރިހާ ކުންފުނިތަކުން ފައިސާ ދައްކައި ހަލާސްކުރުމަށާއި އެހެން ނޫން ނަމަ އެކްސްޕެޓް ސިސްޓަމްގެ ދަށުން ބިދޭސީން ގެނައުމުގެ އާ ހުއްދަދިނުން ހުއްޓާލާނެ ކަމަށް އަންގައިފައެވެ.
