މިހާރު ހިނގަމުންދާ ޔޫކްރެއިން-ރަޝިޔާ ހަނގުރާމައާ ގުޅިގެން، ރަޝިޔާގެ ކާސްކް ސަރަހައްދުގައި ދިވެހި ދަރިވަރުންގެ ހާލު ވަރަށް ގާތުން ބަލަމުން އަންނަ ކަމަށް ފޮރިން މިނިސްޓްރީން ބުނެފިއެވެ.
ފޮރިން މިނިސްޓްރީން ބުނީ، ރަޝިޔާގެ ކާސްކް ސަރަހައްދަށް ނުރައްކާގެ ހާލަތު އޮތުމުން، އެ މިނިސްޓްރީ އާއި ޖަރުމަނުވިލާތުގައި ހުންނަ ދިވެހިރާއްޖޭގެ އެމްބަސީން ދަނީ ކާސްކް ސަރަހައްދުގައި ތިބި ދިވެހި ކިޔަވާ ކުދިންގެ ހާލު ވަރަށް ގާތުން ބަލަމުން ކަމަށެވެ. މިދަނޑިވަޅުގައި، އެ ސަރަހައްދުގައި ދިރިއުޅޭ އަދި ދަތުރުފަތުރު ކުރާ އެންމެހައި ދިވެހި ރައްޔިތުން އަމިއްލަ ރައްކާތެރިކަމާއި ސަލާމަތްތެރިކަމަށް ހާއްސަ އަހައްމިއްޔަތުކަމެއް ދިނުމަށް ފޮރިން މިނިސްޓްރީން ބުނެއެވެ.
ރަޝިޔާގެ ކާސްކްގައި އޮތް ނުރައްކާގެ ހާލަތާ ގުޅިގެން އެއްވެސް އެހީތެރިކަމެއް ބޭނުންވާނަމަ، ޖަރުމަނުވިލާތުގައި ހުންނަ ދިވެހިރާއްޖޭގެ އެމްބަސީއާ ގުޅުމަށް ވެސް އެ މިނިސްޓްރީން ބުނެއެވެ.
އެ އެމްބަސީއަށް ގުޅޭނެ މައުލޫމާތު
- ފޯން: 61 164 129 17 49+
- ހޮޓްލައިން: 60 738 200 30 49+
- އީމެއިލް: [email protected]
މި އަހަރު ފެށުނީއްސުރެ މިއަދާ ހަމައަށް އައި އިރު، ޔޫކްރެއިން-ރަޝިޔާ ހަނގުރާމައާ ގުޅިގެން ޔޫކްރައިންގެ ސަރަހައްދުތަކުން ރަޝިއާއަށް އަތުނުލެވޭހާ ބޮޑު ބިމެއް މި ވަނީ ޔޫކްރެއިން އިން އަތުލާފައެވެ. ރަޝިއާގެ ފައުޖުތަކަށް ޔޫކްރައިން ސިފައިން ހުއްޓުވުމުގައި ގޮންޖެހުންތައް ބޮޑުވެފައިވާ އިރު، ޖުމްލަ 1000 ކިލޯމީޓަރުގެ ސަރަހައްދެއް ޔޫކްރައިން އިން މި ވަނީ ހިފާފައެވެ.
މިއީ ދެވަނަ ބޮޑުހަނގުރާމައަށް ފަހު ރަޝިއާގެ ސަރަހައްދަކަށް ބަޔަކު ވަދެ މި ގޮތަށް ރަޝިއާގެ ބިންތައް ހިފި ފުރަތަމަ ފަހަރެވެ. ރަޝިއާގެ ރައީސް ވްލްޑިމިއާ ޕުޓިން ވިދާޅުވަނީ ޔޫކްރައިންގެ ފައުޖުތައް ބަލިކޮށްލާނެ ކަމަށާއި ވަރުގަދަ ރައްދެއް ދެއްވާނެ ކަމަށެވެ.
ރަޝިއާގެ ތެރެއަށް ޔޫކްރައިންގެ ފައުޖުތައް ވަދެ އެއްގަމު މަގުން ހަމަލާ ދެމުން ގެންދާ އިރު ވައިގެ މަގުން ގައިޑަޑް މިސައިލް ބޭނުންކޮށްގެން ވެސް ދަނީ ހަމަލާ ދެމުންނެވެ. މި ހަމަލާތަކުގައި މަރުވާ މީހުންގެ އަދަދުތައް މަދު ކަމަށް ހަބަރުތަކުން ބުނާ އިރު ހަނގުރާމަ އެންމެ ބާރު ކާސްކް ސަރަހައްދުން އާންމުންގެ 80,000 އެއްހާ މީހުން މިހާރު ވަނީ ރައްކާތެރި ސަރަހައްދުތަކަށް ބަދަލު ކޮށްފައެވެ.
