މާލޭގެ ގެސްޓް ހައުސްއަކަށް ވަދެ، ވަޅިން ބިރު ދައްކައި އެތަނުގައި ހުރި ފައިސާ އާއި ފޯނުތައް ފޭރިގެނެފައިވާ މައްސަލައެއް ބަލަން ފަށައިފިއެވެ.
'ދަ ޕްރެސް' އަށް މައުލޫމާތު ދެމުން ފުލުހުން ބުނީ މާފަންނުގައި ހުންނަ ގެސްޓް ހައުސްއަކާއި ސެލޫނެއްގެ ގޮތުގައި ބޭނުންކުރާ ތަނަކަށް މީހަކު ވަދެ ފޭރުނު މައްސަލައެއް ރޭ 21:59 ހާއިރު ރިޕޯޓް ކޮށްފައި ވާކަމަށެވެ.
އިތުރަށް ފުލުހުން ބުނީ މިހާތަނަށް ބެލިބެލުމުން އެތަނުން ފޭރިފައި ވަނީ ދެ މޯބައިލު ފޯނާއި ފައިސާކަން އެނިގިފައިވާ ކަމަށެވެ. މި މައްސަލައާއި ގުޅިގެން އަދި މީހަކު ހައްޔަރުކޮށްފައި ނުވާކަމަށް ފުލުހުން ވަނީ ބުނެފައެވެ.
މީގެ އިތުރުން ފުލުހުން ބުނީ މި މައްސަލަ ފުލުހުން ތަހުގީގު ކުރަމުން އަންނަކަމަށެވެ.
މައުލޫމާތު ލިބިފައިވާ ގޮތުން ގެސްޓު ހައުސް އަށް ވަދެ ފޭރިގަތް ދެ ފިރިހެނުން އެތަނަށް ވަނީ ހުސް ކޮޓަރި ހުރިތޯ ބެލުމަށެވެ. އަދި ކޮޓަރި އެ ވަގުތު ނެތް ކަމަށް ބުނުމުން ވެސް ތަން ދޫކޮށް ނުގޮސް، ކައުންޓަރުގައި އިން އަންހެން ކުއްޖާ އަށް ވަޅިން ބިރުދައްކާފައި ވާކަމަށް މައުލޫމާތު ލިބެއެވެ.
