ވިއްސާރައިގެ ސަބަބުން ދިމާވާ ދަތިތަކަށް އެމްއެންޑީއެފްގެ އެހީތެރިކަމަށް އެދެން ބޭނުންވާ ފަރާތްތަކަށް ހާއްސަ ހޮޓްލައިން ނަންބަރެއް ހަމަޖައްސައިފިއެވެ.
މިއަދު ހެނދުނުން ފެށިގެން މާލެ އަށް ވެހެމުންދާ ބޯ ވާރޭގައި މަގުތަކުގައި ފެންބޮޑުވެ، އެތައް ބަޔަކަށް ދަތިތަކާ ވަނީ ކުރިމަތިވެފަ އެވެ. މާލޭގައި ގާތްގަނޑަކަށް ހުރިހާ މަގެއްގައި މިހާރު ވަނީ ފެންބޮޑުވެފައިވާ މި ދަނޑިވަޅުގައި ސިފައިންގެ އިތުރުން ފުލުހުން ވެސް ދަނީ މަގުތަކުގައި ހަރަކާތްތެރިވަމުންނެވެ.
ފެންބޮޑުވެ ގެތަކަށް ފެން ވަނަ ނުދިނުމަށް ވެލި ބަސްތާ ޖެހުމާއި އަދިވެސް މަގުތަކުގައި އާންމު އުޅޭ އުޅުމުގައި ދިމާވާ ގޮންޖެހުންތައް ހައްލު ކޮށް އެހީތެރިވެދިނުމަށް އެމްއެންޑީއެފް އާއި ފުލުހުން ގުޅިގެން ކުރަމުންދަނީ ފާހަގަކޮށްލެވޭ މަސައްކަތްތަކެކެވެ.
އެގޮތުގެ މަތިން ރައްޔިތުންނަށް އެހީވެދީ އަދި ރައްޔިތުންނާ ގާތުން މަސައްކަތް ކުރުމަށް އެމްއެންޑީއެފް އިން ވަނީ ހާއްސަ ހޮޓްކައިން ކަމަށްވާ 115 އަށް ގުޅުމަށް އެދިފައެވެ. މި ހޮޓްލައިން ހާއްސަކޮށްފައި ވަނީ ވިއްސާރައިގެ ސަބަބުން ހުށަހެޅޭ ޝަކުވާތައް ބަލައިގަތުމާއި އެކަންކަމަށް ވީހާވެސް އަވަހަށް އިޖާބަ ދިނުމަށް ކަމަށް އެމްއެންޑީއެފް އިން ބުނެއެވެ.
އަދި ވިއްސާރައިގެ ސަބަބުން ލިބިދޭ ގެއްލުންތައް ހައްލުކޮށްދިނުމަށް ނޭޝަނަލް ޑިޒާސްޓާ މެނޭޖްމެންޓާއެކުވެސް އަވަސް މަސައްކަތްތަކެއް ކުރުމަށް މަސައްކަތް ކުރަމުންދާ ކަމަށް އެމްއެންޑީއެފް އިން ވަނީ ބުނެފައެވެ. މާލެ އަށް ބޯކޮށް ވާރޭ ވެހެން ފެށީ މިއަދު ހެނދުނު 11 ޖަހާކަށް ހާއިރެވެ.
ބޯކޮށް ވާރޭވެހި ވައިގަދަވާނެ ކަމަށް ލަފާކޮށް މެޓް އޮފީހުން ވަނީ މިއަދު 14:15 އިން 18:15 އާ ހަމައަށް ކ. އަތޮޅުން ފެށިގެން އދ. އަތޮޅަށް އޮރެންޖު އެލާޓު ނެރެފައެވެ.އެހެންކަމުން ކޮންމެހެން ކުރަން ޖެހިއްޖެ ހާލަތެއްގައި ނޫނީ ކަނޑު ދަތުރު ނުކުރުމަށްވެސް ފުލުހުން ވަނީ އިލްތިމާސްކޮށްފައެވެ.
ހުޅަނގު މޫސުމުގެ ބާރުގަދަވެ، މި ދުވަސްވަރު މުޅި ރާއްޖެއަށް މޫސުން ވަނީ ގޯސްވެފަ އެވެ. މިހާރު މޫސުން އެންމެ ގޯހީ ރާއްޖޭގެ އުތުރުގެ ރަށްތަކަށެވެ.
