ރާއްޖެއިން ފުރާ ބޭރު ގައުމުތަކުގެ މީހުން "ޓްރެވެލާ ޑެކްލެރޭޝަން" ފޯމު ނުވަތަ އިމުގާ ފޯމް ފުރަން ނުޖެހޭ ގޮތަށް އިމިގްރޭޝަނުން ހަމަޖައްސައިފިއެވެ.
ބޭރު ގައުމުތަކުގެ މީހުން ރާއްޖެ އައުމުގެ ކުރިންނާއި ފުރުމުގެ ކުރިން ޑިކްލަރޭޝަން ފޯމް މީގެ ކުރިން ފުރިހަމަ ކުރަން ޖެހެއެވެ. ނަމަވެސް އެ އުސޫލަށް ބަދަލު ގެނެސް އިމްގްރޭޝަނުން ނެރުނު ސާކިއުލާއެއްގައި ބުނީ މި މަހުގެ 15 ވަނަ ދުވަހުން ފެށިގެން ރާއްޖެއިން ފުރާ ބޭރު މީހުން އެ ޑިކްލަރޭޝަން ފޯމް ފުރިހަމަކުރަން ނުޖެހޭނެ ކަމަށެވެ.
ނަމަވެސް ބޭރު ގައުމުތަކުގެ މީހުން ރާއްޖެ އަންނައިރު އެ ފޯމް ފުރިހަމަ ކުރަންޖެހެއެވެ. އެގޮތުން ރާއްޖެ އަށް އައުމުގެ 96 ގަޑިއިރު ކުރިން އޮންލައިން ޕޯޓަލް "އިމުގާ" މެދުވެރިކޮށް ފޯމް ހުށަހަޅަން ޖެހޭނެ ކަމަށް ވެއެވެ. އަދި އެކަން ފަތުރުވެރިންނަށް އެންގުމަކީ ރާއްޖެއަށް ދަތުރު ކުރާ އެއާލައިންތަކުގެވެސް ޒިންމާއެއް ކަމަށް އެ ސާކިއުލާގައި ވަނީ ބުނެފައެވެ.
އެގޮތުން ފްލައިޓަށް އެރުމުގެ ކުރިން އެ ފޯމު ފުރާފައިވާ ކަން ކަށަވަރު ކުރަން ޖެހޭނެ ކަމަށް އިމިގްރޭޝަނުން ވަނީ އެއާލައިންތަކަށްވެސް އަންގައިފަ އެވެ. އަދި މިފަދައިން އަމަލު ނުކުރާ އެއާލައިންތަކަށް ފިޔަވަޅު އަޅާނެ ކަމުގެ އިންޒާރު އިމިގްރޭޝަނުން ވަނީ ދީފައެވެ.
މީގެ ކުރިން ރާއްޖެއަށް އަންނަ އަދި ރާއްޖެއިން ބޭރަށް ފުރާ ދިވެހިންވެސް އިމުގާ ފޯމް ފުރަން ޖެހެއެވެ. ނަމަވެސް ނިމިދިޔަ ނޮވެމްބަރު މަހުން ފެށިގެން އެ އުސޫލުތަކަށް ބަދަލު ގެނެސް ރާއްޖެއިން ބޭރަށް ފުރާ އަދި ބޭރު ގައުމުތަކުން ރާއްޖެ އަންނަ ދިވެހިން އެ ފޯމް ނުފުރާ ގޮތަށް ވަނީ ހަމަޖައްސާފައެވެ.
ޓްރެވެލާ ހެލްތް ޑިކްލަރޭޝަން ފޯމް ރާއްޖޭގައި އަލަށް ތައާރަފް ކޮށްފައި ވަނީ ކޮވިޑްގެ ސަބަބުން ބޯޑަރުގެ ހިދުމަތް ހަރުދަނާ ކުރުމުގެ ގޮތުން ޖުލައި 15، 2020 ގައެވެ. އަދި އެއަށް ފަހު މާޗް 14، 2021 ގައި އެ ފޯމް އޮންލައިން ކޮށް ފުރިހަމަ ކުރާ ގޮތަށް ހަމަޖައްސާ ފޯމްގެ ނަން ވަނީ ޓްރެވަލް ޑިކްލަރޭޝަން ގެ ނަމަށް ބަދަލުކޮށްފައެވެ.
