ގަދަވައިގެ ސަބަބުން އެއްލާލަފާނެ ފަދަ ތަކެތި ބަނދެފައި ބެހެއްޓުމަށް ނޭޝަނަލް ޑިޒާސްޓާ މެނޭޖްމެންޓު އޮތޯރިޓީ (އެންޑީއެމްއޭ) އިން އިލްތިމާސްކޮށްފިއެވެ.
އެންޑީއެމްއޭ އިން ބުނީ ގަދަވައިގެ ސަބަބުން ގޭގެ ފުރާޅު އެއްލާލަފާނެ ކަމަށް ބެލެވޭނަމަ ކުރިއާލާ ވާ ފަދަ އެއްޗެއް ބޭނުން ކޮށްގެން ފުރާޅު އެއްލާނުލާނެ ފަދަ ގޮތަކަށް ހެދުމަށާއި، ބޭނުން ނުކުރާނަމަ ކަރަންޓު ފަދަ ތަކެތި ނިއްވާލާފައި ބެހެއްޓުމަށް ސަމާލުކަން ދިނުމަށެވެ.
މީގެއިތުރުން ގެއަށް ފެންނުވަންނާނެ ފަދައިން ރައްކާތެރި ކަމުގެ ފިޔަވަޅު އެޅުމަށާއި އެގޮތުން ގޭގެ ކުރިމަތީ ވެލި ބަސްތާ ފަދަ ތަކެތި ޖެހުމަށާއި، ގޭގައި ފެންބޮޑުވެއްޖެ ނަމަ ގެއްލުންވާނޭ ފަދަ މުދާ އުސްތަންތަނަށް ބަދަލު ކުރުމަށްވެސް އެންޑީއެމްއޭއިން ވަނީ އިލްތިމާސްކޮށްފައެވެ.
ބަނދަރުގައި އަޅާފައި ހުރި އޮޑިދޯނިފަހަރުގެ ވާ ކަނޑައިގެން ނުދާނެ ފަދައިން އައްސާފައި ބެހެއްޓުމަށާއި، ބްރިޖުން ދަތުރުކުރާ ފަރާތްތަކުން ދިޔަވަރު ބޮޑުވާ ވަގުތު ދަތުރު ކުރާއިރު ހާއްސަ ސަމާލުކަމެއް ދިނުމަށްވެސް އެންޑީއެމްއޭއިން އެދިފައެވެ.
ބޯކޮށް ވާރޭވެހުމާއެކު ގަޑިއަކު 25 މޭލާއި 30 މޭލާ ދެމެދު ބާރު މިނެއްގައި ވައި ޖެހޭނެ ކަމަށް ލަފާކޮށް މެޓް އޮފީހުން ވަނީ މިއަދު 7:00 އިން 13:00 އާ ހަމައަށް އުތުރުގެ އަތޮޅުތަކަށް ރީނދޫ އެލާޓު ނެރެފައެވެ.
މިހަފްތާގައި ރާއްޖެއަށް ވިއްސާރަކުރާނެކަމަށް ލަފާކޮށް މޫސުމަށް ސަމާލުވުމަށް މެޓް އޮފީހުން އިލްތިމާސްކޮށްފައިވާއިރު، ކަނޑު ގަދަވާނެ ކަމަށް ލަފާ ކުރެވޭތީ މެޓް އޮފީހުން ވަނީ ކަނޑު ދަތުރު ކުރާ ފަރާތްތަކުން ހާއްސަ ސަމާލުކަމެއް ދިނުމަށް އިލްތިމާސްކޮށްފައެވެ. އަދި ގަދަވަޔާއެކު ބޯކޮށް ވާރޭ ވެހުމުގެ ސަބަބުން ކުރިމަތިވެދާނެ ނުރައްކާތަކުން ސަލާމަތް ވުމަށާއި ލިބިދާނެ ގެއްލުންތައް ކުޑަކުރުމަށް ރައްކާތެރި ކަމުގެ ފިޔަވަޅުތައް އެޅުމަށް ވެސް މެޓް އޮފީހުން ވަނީ ގޮވާލާފައެވެ.
