ރާއްޖެއަށް މިހާރު ކުރަމުންދާ ވިއްސާރައިގައި 9 ރަށެއްގައި ފެންބޮޑުވެގެން ރިޕޯޓު ކޮށްފިއެވެ.
ނޭޝަނަލް ޑިޒާސްޓާ މެނޭޖްމެންޓު އޮތޯރިޓީ (އެންޑީއެމްއޭ) އިން ބުނީ މިއަދު ހަވީރު 6 އާހަމަޔަށް 9 ރަށަކުން ވައިގަދަވެގެންނާއި ފެންބޮޑުވެގެން ރިޕޯޓު ކޮށްފައިވާ ކަމަށެވެ. އެންޑީއެމްއޭ އިން ވަނީ އެއްވެސް އާއިލާއެއް ބަދަލުކުރަންޖެހޭ ފަދަ ހާލަތެއް އަދި ނެތް ކަމަށްވެސް ބުނެފައެވެ.
މި ވިއްސާރައިގައި ރަށްރަށަށް ލިބެމުންދާ ގެއްލުންތައް ކައިރިން ބަލަމުން ދާ ކަމަށް އެންޑީއެމްއޭއިން ވަނީ ބުނެފައެވެ.
މިހާރު ރާއްޖެއަށް ކުރަމުން މިދާ ވިއްސާރައިގައި މިއަދު ވަނީ އައްޑޫ ސިޓީ ސ. މަރަދޫ އާލީ ގޭގެ ފުރާޅުވެސް އެއްލާލާފައެވެ. އެއާއެކު އެމްއެންޑީއެފްގެ ސަދަން އޭރިއާ ކޮމާންޑުން ވަނީ އެ ފަރާތްތަކަށް ވަގުތީ ހައްލެއް ހޯދައި ދިނުމުގައި އެހީތެރިވެފައެވެ.
މިހަފްތާގައި ރާއްޖެއަށް ވިއްސާރަކުރާނެކަމަށް ލަފާކޮށް މޫސުމަށް ސަމާލުވުމަށް މެޓް އޮފީހުން އިލްތިމާސްކޮށްފައިވާއިރު، ކުރިއަށް އޮތް ތިން ދުވަހު، މާލެ ސަރަހައްދަށް އެއް މަސް ދުވަހުގެ ވާރޭވެހުން އެކަށީގެންވާ ކަމަށް އިންޓަނޭޝަނަލް ވެދާ ރިޕޯޓިން އިން ވެސް ވަނީ ބުނެފައެވެ.
އަލްޖަޒީރާއިން ދުނިޔޭގެ އެކު ގައުމުތަކުގެ މޫސުން ލަފާކޮށް ބުނެފައިވަނީ، ރާއްޖޭގެ ވެރިރަށް މާލެ އަށް ކުރިއަށް އޮތް 72 ގަޑިއިރުގެ ތެރޭގައި އެއް މަސްދުވަހުގެ ވާރޭވެހުން އެކަށީގެންވާ ކަމަށެވެ.
ބޯކޮށް ވާރޭވެހުމާއެކު ގަޑިއަކު 25 މޭލާއި 30 މޭލާ ދެމެދު ބާރު މިނެއްގައި ވައި ޖެހޭނެ ކަމަށް ލަފާކޮށް މެޓް އޮފީހުން ވަނީ މިއަދު 19:00 އިން 1:00 އާ ހަމައަށް ހއ. އަތޮޅުން ފެށިގެން ތ. އަތޮޅަށް ރީނދޫ އެލާޓު ނެރެފައެވެ. ކަނޑު ގަދަވާނެ ކަމަށް ލަފާ ކުރެވޭތީ މެޓް އޮފީހުން ވަނީ ކަނޑު ދަތުރު ކުރާ ފަރާތްތަކުން ހާއްސަ ސަމާލުކަމެއް ދިނުމަށް އިލްތިމާސްކޮށްފައެވެ.
