ގެއްލިގެން ހޯދަމުންދިޔަ ކުޅުދުއްފުށީ ޒުވާނާ ފެނިފައިވާ ކަމަށް ފުލުހުން ބުނެފިއެވެ.
ހދ. ކުޅުދުއްފުށި / ކިނާރާގެ، އަހުމަދު އަނިލް މުހައްމަދު (23އ) ގެއްލިގެން އާންމުންގެ އެހީތެރިކަމަށް ފުލުހުން އެދިފައި ވަނީ މިދިޔަ ހޮނިހިރު ދުވަހުގެ ރޭގެ ވަގުތެއްގައެވެ.
އަދި އޭނާގެ ހަބަރެއް އެންމެ ފަހުން ވެފައިވަނީ މި މަހުގެ 8 ވަނަ ދުވަހުގެ ހެނދުނު ފޯނުން ކަމަށް އޭނާގެ އާއިލާއާއި ހަވާލާދީ ފުލުހުން ބުނެފައި ވެއެވެ. ނަމަވެސް އޭގެ ފަހުން އަނިލްގެ ހަބަރެއް ނުވާ ކަމަށް އޭރު ފުލުހުން މައުލޫމާތު ދިނެވެ.
އެ މައްސަލައާއި ގުޅޭ އެންމެ ފަހުގެ މައުލޫމާތު ހިއްސާ ކުރަމުން ފުލުހުން ބުނީ އަނިލް އޭނާގެ އާއިލާއަށް ހަބަރުވެފައިވާ ކަމަށް އާއިލާއިން މައުލޫމާތު ދީފައިވާ ކަމަށެވެ. އަދި އޭނާގެ ހާލު ރަނގަޅު ކަމަށްވެސް އާއިލާއާ ހަވާލާދީ ފުލުހުން ވަނީ ބުނެފައެވެ.
ނަމަވެސް އެ ކަމާ ގުޅޭ އިތުރު އެއްވެސް މައުލޫމާތެއް ފުލުހުން ހިއްސާކޮށްފައި ނުވެއެވެ.
ދޭތެރެ ދޭތެރެއިން މީހުން ގެއްލޭ މައްސަލަ މިފަހުން ވަނީ ރާއްޖޭގައި އާންމު ވެފައެވެ. އަދި އެފަދަ ގިނަ މީހުންގެ ވަނަވަރު ފުލުހުން އާންމު ކުރާތާ މާ ގިނަ އިރެއް ނުވެ އާއިލާއަށް ނުވަތަ ފުލުހުންނަށް ހަބަރު ވެއެވެ. .
