ސައިކަލު ވިއްކާ ކަމަށް ބުނެ މަކަރާއި ހީލަތުން ފައިސާ ނެގި މައްސަލައެއް ފުލުހުން ތަހުގީގު ކުރަން ފަށައިފިއެވެ.
ފުލުހުން ބުނީ ކިންގްސްޓޮން ހޯލްޑިންގްސް މޯލްޑިވްސް ޕްރައިވެޓް ލިމިޓެޑުން އާންމުންނަށް ސައިކަލު ވިއްކާ ކަމަށް ބުނެ މަކަރާއި ހީލަތުން ފައިސާ ނަގާފައިވާ ކަމަށް ތުހުމަތުކުރެވޭ މައްސަލަތަކެއް ފުލުހުންނަށް ހުށަހަޅާފައިވާ ކަމަށެވެ.
ފުލުހުން ވަނީ ކިންގްސްޓޮން ހޯލްޑިންގްސް މޯލްޑިވްސް ޕްރައިވެޓް ލިމިޓެޑުން ސައިކަލު ގަތުމުގައި މަކަރާއި ހީލަތުގެ އަމަލެއްގެ ޝިކާރައަކަށް ވެފައިވާ އިތުރު އެއްވެސް ފަރާތެއް ވާނަމަ، ފުލުހުންގެ އިކޮނޮމިކް ކްރައިމް އިންވެސްޓިގޭޝަންގެ ނަންބަރު 9790048 އަށް ގުޅާ އެ މައުލޫމާތު ހިއްސާކުރުމަށް އެދިފައެވެ.
ފުލުހުން ވަނީ މިފަދަ މައްސަލަތަކުގައި ރައްޔިތުންގެ ފަރާތުން ބޮޑެތި އެއްބާރުލުން ލިބޭކަން ފާހަގަކޮށް ޝުކުރު ދަންނަވާފައެވެ.
އޮޅުވާލައިގެން މަކަރާއި ހީލަތުން މީހުންގެ އަތުން ރުފިޔާ ފޭރިގަތުމާ ސްކޭމްތައް މިހާރު އާންމުވެފައިވާއިރު، ފުލުހުންގެ 'އެންޓި ސްކޭމް' ސެންޓަރުގެ ހެޑް އަދި އިންސްޕެކްޓާ އޮފް ޕޮލިސް މަރިޔަމް ރަޝީދާ ވަނީ މި އަހަރުގެ މިހާތަނަށް ސްކޭމް މައްސަލަތަކުގައި 500 އަށް ވުރެ ގިނަ ބޭންކް އެކައުންޓް ބްލޮކް ކޮށްފައިވާ ކަމަށް ވިދާޅުވެފައެވެ.
ރަޝީދާ ވިދާޅުވި ގޮތުގައި މިދިޔަ އަހަރު ސްކޭމްއާ ގުޅުން ހުރި 1،661 މައްސަލަ ރިޕޯޓްކޮށްފައިވާއިރު އެ ސްކޭމްތަކުގެ އަގު 20 މިލިއަން ރުފިޔާއަށް އަރައެވެ. އަދި މި އަހަރުގެ ޖޫން މަހުގެ ނިޔަލަށް ސްކޭމްގެ 1302 މައްސަލަ ރިޕޯޓްކޮށްފައިވާ ކަމަށް އޭނާ ވިދާޅުވިއެވެ.
