މާލޭގެ އެޕާޓްމަންޓަކުން ފައިސާތަކެއް ފޭރުނު ތުހުމަތުގައި މީހަކު ހައްޔަރުކޮށްފިއެވެ.
ފުލުހުން ބުނީ މި މައްސަލައިގައި ހައްޔަރު ކޮށްފައިވަނީ ކ.މާލެ، ދިންމަނަ، އަބްދުﷲ ތިލްމީޒް (32އ) ކަމަށެވެ. ފުލުހުން ބުނީ މާލޭގެ އެޕާޓްމެންޓަކުން މިއަދު ފޭރިފައިވާ 26960ރ. ހޯދާ އޭގެ ވެރިފަރާތާއި ހަވާލުކޮށްފައިވާ ކަމަށެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
ވައްކަމާއި ފޭރުމުގެ މައްސަލަތައް އިތުރުވެފައިވާއިރު، ތަފާސްހިސާބުތަކުން ދައްކާގޮތުގައި ނިމިދިޔަ ޖޫން މަހުވެސް ވަނީ ވައްކަމުގެ 315 މައްސަލައެއް ހުށަހަޅާފައެވެ. އަދި ފޭރުމުގެ 29 މައްސަލައެއް ވަނީ ހުށަހަޅާފައެވެ.
ފުލުހުން ދަނީ ގެއިން ބޭރަށްދާނަމަ ގޭގެ ދޮރުތައް ރަނގަޅަށް ތަޅުލުމާއި ބޭރަށް ކުޑަދޮރެއް ނުވަތަ ފަސޭހައިން ވަދެވޭނެ ޖާގައެއް ހުރި ނަމަ ސަލާމަތީ ފިޔަވަޅު އެޅުމަށް އިރުޝާދު ދެމުންނެވެ. އަދި ގޭގައި ގެންގުޅޭ އަގުބޮޑެތި ސާމާނުތައް ވަގުންނަށް ނުނެގޭނެ ފަދަ ގޮތަކަށް ރައްކާ ކުރުމަށްވެސް ފުލުހުން ވަނީ އިރުޝާދު ދީފައެވެ.
