ބަންގްލަދޭޝްގެ ކުރީގެ ބޮޑުވަޒީރު ޝައިހު ހަސީނާގެ ސަރުކާރު ވައްޓާލުމުގައި އިސްކޮށް ހަރަކާތްތެރިވި ދަރިވަރުންގެ ޔޫނިއަނުން ބޭނުންވަނީ ވަގުތީ ސަރުކާރުގެ ވެރިއަކަށް ނޯބެލް އިނާމު ހޯއްދަވާފައި ވާ މުހައްމަދު ޔޫނުސް ގެންނަން ކަމަށް ބުނެފިއެވެ.
'ފަގީރުންގެ ބޭންކާ' ގެ ގޮތުގައި މަޝްހޫރުވެފައި ވާ ޔޫނުސް އަކީ, މާލީ ދާއިރާއިން ބަންގްލަދޭޝް އަށް އިންގިލާބީ ބަދަލެއް ގެނެސްދެއްވި އީޖާދީ ބޭފުޅެކެވެ. 2006 ގައި އޭނާއަށް ނޯބެލް އިނާމު ލިބިވަޑައިގެންފައި ވަނީ, ބަންގަލަދޭޝްގައި އޮތް ފަގީރުކަން ނައްތާލުމަށް އަމާޒުކޮށް ތައާރަފު ކުރެއްވި އެންމެ ކުދިފަންތީގެ ލޯނު ޕްރޮގްރާމުގެ ފުރިހަމަ ކަމަށްޓަކައެވެ. އެ ލޯނު ޕްރޮގްރާމުގެ އެހީގައި އެތައް މިލިއަން ބަޔަކު ފަގީރުކަމުން އަރައިގެން ކަމަށް ބުނެއެވެ.
ނަމަވެސް ހަސީނާގެ ވެރިކަމުގައި ޔޫނުސްގެ މައްޗަށް ކޮރަޕްޝަންގެ ތުހުމަތުތަކެއް ކޮށް އޭނާ ހުރީ ޖަލަށް ލައިފައެވެ.
ހަސީނާގެ ވެރިކަން ވައްޓާލުމުގައި އިސް ދައުރެއް އަދާކުރި ދަރިވަރުންގެ ޔޫނިއަނުން ބުނީ, ވަގުތީ ސަރުކާރުގެ ވެރިއަކަށް ވާންވާނީ ޔޫނުސް ކަމަށާއި އަސްކަރީ ސަރުކާރެއް ގަބޫލު ނުކުރާނެ ކަމަށެވެ.
ދަރިވަރުންގެ މިހުށަހެޅުމާ ގުޅޭ ގޮތުން މިވަގުތު ބަންގްލަދޭޝްގެ ކަންކަން ބެލެހެއްޓުމާ ހަވާލުވެ ހުންނެވި ޖެނެރަލާއި ދަރިވަރުން މަޝްވަރާ ކޮށްފައި ވާ އިރު, ދަރިވަރުންގެ ހުށަހެޅުމާ އެއްގޮތަށް ޔޫނުސް އަށް އިސްދައުރެއް ދިނުމަށް ވަނީ އެއްބަސްވެފައެވެ.
ޔޫނުސްގެ ތަރުޖަމާނުންނާ ހަވާލާދީ ހަބަރުތަކުން ބުނާގޮތުން, އޭނާވެސް ވަނީ ދަރިވަރުންގެ ހުށަހެޅުން އައްސަވާ ވަގުތީ ސަރުކާގެ ޗީފް އެޑްވައިޒަރުކަން ގަބޫލުކުރައްވާފައެވެ.
ހަސީނާ އިސްތިއުފާ ދެއްވުމާއެކު ބަންގްލަދޭޝް ހިންގެވުމާ ހަވާލުވެ މިވަގުތު ހުންނެވީ ޖެނެރަލް ވޯކާ އުޒް ޒަމާންއެވެ.
އޭނާ ވިދާޅުވީ, ގައުމުގެ އާންމު މަސްލަހަތު ހަމައަކަށް އެޅުވުމަށާއި ވަގުތީ ސަރުކާރެއް އެކުލަވާލުމަށް އެކިއެކި ފަރާތްތަކާއެކު މަޝްވަރާތައް ކުރައްވަމުން ގެންދަވާ ކަމަށާއި އޭގެ ތެރޭގައި ހަސީނާ ނިސްބަތްވެ ވަޑައިގަންނަވާ އަވާމީ ލީގްގެ ވެރިންވެސް ހިމެނޭ ކަމަށެވެ.
އޭނާ ވަނީ މިދިޔަ ޖުލައި މަހުން ފެށިގެން މިހާތަނަށް ބަންގްލަދޭޝްގެ އެކި ސަރަހައްދުތަކުގައި މަރުވި 135 މީހެއްގެ މަރުގެ ތަހުގީގު ދަރިވަރުންގެ ޑިމާންޑާ އެއްގޮތަށް, ހިންގަވާނެ ކަމަށް ވައުދުވެވަޑައިގެންފައެވެ.
ހަސީނާ ވެރިކަން ދޫކުރައްވައި ފިއްލަވައިގެން އިންޑިއާއަށް ވަޑައިގެންފައި ވާ އިރު, އޭނާގެ ވެރިކަމުގައި ޖަލަށް ލި އިދިކޮޅު ލީޑަރު ހާލިދާ ޒިއާވެސް މިހާރުވަނީ މިނިވަން ކޮށްފައެވެ.
ބަންގްލަދޭޝްގައި އޮންނަ އެންމެ ބޮޑު 2 ޕާޓީން, އެއް ބަޔަކަށް ފަހު އަނެއް ބަޔަކު ވެރިކަން ކުރަމުން އަންނަ އިރު, މުރާސިލުން ބުނާގޮތުން ދެން ބޮޑުވަޒީރަކަށް ވެވަޑައިގަންނަވާނީ ހާލިދާއެވެ. ނަމަވެސް ހާލިދާ އަކީވެސް ވެސް ޒުވާނުން, ހާއްސަކޮށް ދަރިވަރުން ގަބޫލު ބޭފުޅެއް ނޫނެވެ.
ހަސީނާގެ ވެރިކަން ދަރިވަރުން ނިކުމެ ވައްޓާލި އިރު 2009 އިން ފެށިގެން ވެރިކަމުގައި ހުންނެވީ އޭނާއެވެ.
