ބިދޭސީންގެ މައްސަލަ ރިޕޯޓް ކުރުމަށް ގާއިމް ކުރި "އިމިގްރޭޝަން ވޮޗް" އަށް ލިބުނު މައުލޫމަތަކާ ގުޅިގެން ކާބޯތަކެތި ޑެލިވަރީ ކުރާ ތަނެއް ބަލައި ފާސްކޮށް ހަތަރު ބިދޭސީއަކު އަތުލައިގެންފިއެވެ.
އިމިގްރޭޝަނުން ބުނީ، އެތަނަކީ ފުޅާދާއިރާއެއްގައި ކާބޯތަކެތި ޑެލިވެރީ ކުރުމުގެ ހިދުމަތް ދެމުން ދިޔަ ތަނެއް ކަމަށް "އިމިގްރޭޝަން ވޮޗް" އަށް ރިޕޯޓު ކޮށްފައިވާ ތަނެއް ކަމަށާއި މިއަދު ވަނީ ބަލައި ފާސްކޮށްފައި ކަމަށެވެ. އަދި ގަވާއިދާ ހިލާފަށް އެތަނުގައި މަސައްކަތް ކުރަމުންދިޔަ ހަތަރު ބިދޭސީން ވަނީ އިމިގްރޭޝަން ބެލުމުގެ ދަށަށް ގެންގޮސްފައެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ރައްޔިތުން ދޭ އެއްބާރުލުން ފާހަގަކޮށް އިމިގްރޭޝަނުން ވަނީ ޝުކުރު އަދާކޮށްފައެވެ. އަދިވެސް މިފަދަ މައްސަލަތައް "އިމިގްރޭޝަން ވޮޗް" މެދުވެރިކޮށް ރިޕޯޓު ކުރަމުން ދިއުމަށް ވެސް އިމިގްރޭޝަނުން އެދެއެވެ.
ގަވައިދާ ހިލާފަށް އުޅޭ ބިދޭސީން ރިޕޯޓް ކުރުމަށް އޮންލައިން ޕްލެޓްފޯމް "އިމިގްރޭޝަން ވޮޗް" މިިދިޔަ ޖުލައި މަހުގެ 17 ވަނަ ދުވަހު އިފްތިތާހު ކޮށްފައިވާ އިރު، އިމިގްރޭޝަން ވޮޗް އަށް ލިބޭ މައުލޫމާތާ ގުޅިގެން ގިނަ ތަންތަން މިހާތަނަށް ވަނީ ބަލައި ފާސްކޮށްފައެވެ. އެގޮތުން ޖުލައި 18 ވަނަ ދުވަހު ބިދޭސީ ބަޔަކު ހުޅުމާލޭގައި ގަރާޖަކާއި އެތަނުގެ މަތީގައި ހިންގަމުންދާ ކާބޯތަކެތި ޑެލިވަރީ ކުރާ ތަނެއް ބަލައި ފާސްކޮށް ވަނީ ޖުމްލަ 11 މީހަކު އިމިގްރޭޝަންގެ ބެލުމުގެ ދަށަށް ގެންގޮސްފައެވެ. ޖުލައި 19 ވަނަ ދުވަހުވެސް ވަނީ ހުޅުމާލޭން 4 ތަނެއް ބަލައި ފާސްކޮށް 2 ބިދޭސީ އަންހެނަކު އަތުލައިގެންފައެވެ. ޖުލައި 20 ވަނަ ދުވަހު ހަ ތަނެއް ބަލައި ފާސްކޮށް 2 ބިދޭސީއަކު އަތުލައިގެންފައިވާ އިރު، ޖުަލއި 21 ވަނަ ދުވަހު މާލޭގެ ދެ ތަނެއް ބަލައި ފާސްކޮށް ބިދޭސީ އަންހެނަކު ވަނީ އަތުލައިގެންފައެވެ.
ހަމައެއާއެކު 23 ޖުލައިގައި 12 ތަނެއް ބަލައި ފާސްކޮށް 11 ބިދޭސީއަކު އަތުލައިގެންފައިވާ އިރު، ޖުލައި 25 ވަނަ ދުވަހު ގަވައިދާ ހިލާފަށް އުޅޭ 16 ބިދޭސީއަކު ވަނީ އަތުލައިގެންފައެވެ. އަދި ޖުލައި 27 ވަނަ ދުވަހު ހުޅުމާލޭގައި ހުރި ތިން ބުރީގެ އިމާރާތަކުން ވަނީ ގަވައިދާ ހިލާފަށް އުޅޭ 22 ބިދޭސީއަކު އަތުލައިގެންފައެވެ.
އިމިގްރޭޝަން ވޮޗްގެ ޒަރިއްޔާއިން ރިޕޯޓްކުރާ މައްސަލަތައް އިތުރުވަމުން އަންނަ އިރު މިއީ ބިދޭސީންގެ މައްސަލަ ހައްލު ކުރުމަށް އާންމުންގެ ފުރިހަމަ އެއްބާރުލުން ލިބެމުން އަންނަ އަދި ކާމިޔާބު އޮޕަރޭޝަނެއް ގޮތުގައި ވަނީ ފާހަގަ ވެފައެވެ. އިމިގްރޭޝަން ވޮޗްއަށް ރިޕޯޓްކުރާ މައްސަލަތަކުގެ ސިއްރު ހިފެހެއްޓޭނެ ކަމަށާއި މައުލޫމާތު ފޯރުކޮށްދޭ ފަރާތުން އެ ފަރާތުގެ މައުލޫމާތު ހާމަކުރަން ބޭނުން ނުވާ ހާލަތްތަކުގައި އެގޮތަށް ވެސް ރިޕޯޓް ކުރެވޭނެ ކަމަށް އިމިގްރޭޝަނުން ބުނެއެވެ.
މި ޕްރެލްޓްފޯމު މެދުވެރިކޮށް އާންމުންނަށް ބޮޑެތި ކުށްތައް ހުއްޓުވުމުގެ ފުރުސަތު ލިބިގެން އަންނައިރު މި ގޮތަށް ދެވޭ ތަފްސީލީ މައުލޫމާތުގެ ސަބަބުން ބޮޑެތި ކުށްކުރާ ފަރާތްތައް ދެނެގަނެވި މިފަދަ މައްސަލަތައް ބެލުމަށް އިތުރު ކުރިއެރުންތައް ލިބިގެން ދާނެއެވެ. މި ސަރުކާރުގެ އަމާޒަކީ ގަވާއިދާ ހިލާފަށް އުޅޭ ބިދޭސީންގެ މައްސަލަ ތިން އަހަރު ތެރޭގައި ހައްލު ކުރުން ކަމަށް ވަނީ ބުނެފައެވެ.
އިމިގްރޭޝަނުން މި ދިޔަ ނޮވެމްބަރު 17 އިން ފެށިގެން މި މަހުގެ 11 ވަނަ ދުވަހާ ހަމައަށް ވަނީ ގަވައިދާ ހިލާފަށް އުޅޭ 2013 ބިދޭސީއަކު ޑީޕޯޓް ކޮށްލާފައެވެ. ގަވާއިދާ ހިލާފަށް އުޅޭ ބިދޭސީން ހައްޔަރު ކޮށް ޑީޕޯޓް ކުރަމުން އަންނަ އިރު، މި ބިދޭސީންނަށް ދެވަނަ ފުރުސަތެއް ނުދޭނެ ކަމަށް އިމިގްރޭޝަން ކޮންޓްރޯލާ ވަނީ ވިދާޅުވެފައެވެ.
