މިރޭ ހުޅުމާލޭގައި ހުންނަ އަމިން އެވެނިއު ކައިރިން 48 ދަޅު ބިޔަރާއި ރާފުޅިއަކާއެކު ބިދޭސިއަކު އަތުލައިގެންފިއެވެ.
ފުލުހުން ބުނީ އެމީހާ އަތުލައިގަނެ ހައްޔަރުކޮށްފައި ވަނީ މިރޭ 10:00 ގައި ކަމަށެވެ. އެއީ ބިދޭސީއެއް ކަމުގައި ފުލުހުން ބުނި ނަމަވެސް އެއީ ކޮން ގައުމަކަށް ނިސްބަްވާ މީހެއް ކަމެއް ފުލުހުން ހާމައެއް ނުކުރެއެވެ.
ފުލުހުން ބުނީ މި މައްސަލަ ދަނީ ތަހުގީގު ކުރަމުން ކަމަށެވެ.
ބިދޭސީންގެ މައްސަލަތައް ގިނަވަމުން އަންނަ އިރު، ކުށްތަކަށް އަރައިގަންނަ ބިދޭސީން ފެންނަ ކަމާއި އެފަދަ މީހުންގެ ތެރޭގައި ގަވައިދާ ހިލާފަށް ރާއްޖޭގައި އުޅޭ ބިދޭސީން ގިނަ ކަން މީގެ ކުރިން ފުލުހުން ވަނީ ފާހަގަކޮށްފައެވެ. އެގޮތުން މި ސަރުކާރުން ރާއްޖޭގައި ހުރި ބިދޭސީންގެ މައްސަލަތައް ހައްލު ކުރުމަށް މަސައްކަތް ކުރަމުން އަންނަ އިރު، ގަވައިދާ ހިލާފަށް އުޅޭ ބިދޭސީންނާއި އެފަދަ ބިދޭސީން ިންގާ ވިޔަފާރިތައް ދެނެގަނެ އެތަންތަން ބަންދު ކުރުމުގެ މަސައްކަތް އަންނަނީ ކުރަމުންނެވެ.
މި އޮޕަރޭޝަންގެ ތެރެއިން މިދިޔަ މަހުގެ 21 އާ ހަމައަށް 2013 ބިދޭސީން ހިފަހައްޓައި އެމީހުން ވަނީ ޑީޕޯޓް ކޮށްލާފައި ކަމަށް އިމިގްރޭޝަން އިން ބުނެއެވެ. އަދި އެމީހުންގެ ތެރޭގައި ކުށްތަކަށް އަރައިގެންފައިވާ އެތައް ބަޔަކު ހިމެނޭ ކަމަށް ވެސް އިމިގްރޭޝަނުން ބުނެއެވެ.
ރާއްޖޭގައި އުޅޭ ބިދޭސީންގެ ތެރޭގައި މަސްތުވާތަކެތީގެ ވިޔަފާރީގައި އުޅޭ ބިދޭސީން މިހާރު އަންނަނީ އާންމުވަމުންނެވެ.
