ނ. ހެނބަދޫ ޕޮލިސް ޕޯސްޓުގައި މަސައްކަތްކުރާ ފުލުހުންނަށް ބިރުދައްކާ، ފުލުހެއްގެ ސައިކަލަކަށް ގެއްލުންދީ އިތުރު ސައިކަލެއްގައި އަލިފާން ރޯކޮށްލި މީހުން ހައްޔަރުކޮށް، އެމީހުންގެ ވަނަވަރު ފުލުހުން ހާމަކޮށްފިއެވެ.
ފުލުހުން ބުނީ ހެނބަދޫ ޕޮލިސް ޕޯސްޓްގައި މަސައްކަތްކުރާ ފުލުހުންނާ، އެމީހުންގެ އާއިލާއަށް ބިރުދައްކާ މުދަލަށް ގެއްލުންދޭނެ ކަމަށް ބުނެ އިންޒާރު ދިން މައްސަލައާއި ގުޅިގެން ކޯޓު އަމުރެއްގެ ދަށުން 33 އަހަރުގެ ދިވެހި 2 ފިރިހެނުން ހައްޔަރުކޮށްފައިވާ ކަމަށެވެ.
މި މައްސަލައިގައި ހައްޔަރުކޮށްފައިވަނީ ނ.ހެނބަދޫ، ސެލްވިޔޯ، އިލްޔާސް އިބްރާހީމް އާއި ނ.ހެނބަދޫ، ހުދުތަރި، މުހައްމަދު އިރުޝާދުއެވެ.
މި މައްސަަލަ ފުލުހުން ދަނީ އިތުރަށް ތަހުގީގުކުރަމުންނެވެ.
ނ. ހެނބަދޫގައި ފުލުހެއްގެ ސައިކަލަށް އޮގަސްޓު 1 ވަނަ ދުވަހު ގެއްލުން ދީފައިވާއިރު އިތުރު ފުލުހެއްގެ ސައިކަލުގައި އެރޭ ދަންވަރު ވަނީ ރޯކޮށްލާފައެވެ. ފުލުހުން ވަނީ މިއީ ނ. އަތޮޅުގައި ފުލުހުން ހިންގަމުންދާ މަސްތުވާތަކެތީގެ އޮޕަރޭޝަނަކާ ދެކޮޅަށް އެކަމުގައި ތުހުމަތު ކުރެވޭ ބަޔަކު ކޮށްފައިވާ ކަމެއްކަމަށް ތުހުމަތުކޮށްފައެވެ.
